July 20, 2024
ෆීල්ඩ් මාර්ෂල් සරත් ෆොන්සේකා සිය ජනාධිපති අපේක්ෂකත්වය සම්බන්ධයෙන් අගෝස්තු මස මුලදී මාධ්‍ය හමුවක් පවත්වමින් ප්‍රකාශයට පත් කිරීමට නියමිත බව ඔහුගේ උපදේශකයන් ප්‍රකාශ කර තිබේ.
ෆොන්සේකාගේ ජ්‍යෙෂ්ඨ උපදේශක ජගනා ක්‍රිෂ්ණකුමාර් සහ උපායමාර්ගික උපදේශක වෙන්කටේෂ් තර්මරාජා ප්‍රකාශ කර ඇත්තේ අගෝස්තු 7 සහ 9 අතර දිනකදී විධිමත් නිවේදනයක් නිකුත් කරන බවයි.
ෆොන්සේකා නිර්පාක්ෂික ස්වාධීන ජනතා අපේක්ෂකයකු ලෙස තරඟ කරන බව ඔවුන් තහවුරු කර ඇත.
මන්ත්‍රීවරුන්, හිටපු මන්ත්‍රීවරුන් සහ ප්‍රකට පුද්ගලයන් රැසකගේ සහාය ෆොන්සේකාට හිමිවන බව ද ඔවුන් ප්‍රකාශ කර ඇත.
ෆොන්සේකා සිය අපේක්ෂකත්වය කලින් ප්‍රකාශ කිරීමට නියමිතව තිබුණ ද නිවේදනය ප්‍රමාද වීම සම්බන්ධයෙන් ඔවුන් පවසා ඇත්තේ විධිමත් නිවේදනයට පෙර යම් යම් කරුණු අවසන් කිරීමට තිබූ බවයි.
වත්මන් ජනාධිපති රනිල් වික්‍රමසිංහ, සමගි ජනබලවේගයේ නායක සජිත් ප්‍රේමදාස සහ ජාතික ජන බලවේගයේ නායක අනුර කුමාර දිසානායකට එරෙහිව ෆොන්සේකා තරඟ වදින බවට මීට පෙර ද මාධ්‍ය වාර්තා පළවී තිබිණි.
පසුගියදා පැවති සම්මුඛ සාකච්ඡාවකදී ෆොන්සේකා ප්‍රකාශ කර තිබුණේ තමන් ප්‍රේමදාසට ජනාධිපති වීමට සහාය නොදෙන බවයි.
වික්‍රමසිංහ ජනාධිපතිවරයා ශ්‍රී ලංකා පොදුජන පෙරමුණ සමඟ කටයුතු කරන බැවින් තමා ඔහුට ද සහාය නොදෙන බව ඔහු ප්‍රකාශ කර තිබිණි.
