ඩේටින් ඇප් (Dating apps) සහ සමාජ මාධ්‍ය ජාලා ඔස්සේ නාඳුනන පුද්ගලයන් සමඟ සබඳතා ඇති කර ගැනීමේදී දැඩි ලෙස ප්‍රවේශම් වන ලෙස පොලිසිය මහජනතාවගෙන් ඉල්ලා සිටියි.

වංචනික ජංගම දුරකථන යෙදුම් භාවිතා කරමින් සිදුකරන මූල්‍ය වංචා පිළිබඳව පොලිසිය මෙලෙස අනතුරු අඟවයි.

මෑතකදී වාර්තා වූ සිදුවීම් කිහිපයකට අනුව, වංචාකරුවන් ඩේටින් ඇප් හරහා වින්දිතයන් සමඟ මිත්‍රත්වයන් හෝ ප්‍රේම සබඳතා ඇති කර ගනී. ඔවුන්ගේ විශ්වාසය දිනාගෙන රවටා ගැනීම සඳහා කෙටි හෝ දිගු කාලයක් පුරා ආකර්ශනීය පණිවුඩ යැවීමට මෙම වංචාකරුවන් කටයුතු කරයි.

පොලිසිය පවසන පරිදි, ෆේස්බුක් (Facebook), වට්ස්ඇප් (WhatsApp) සහ ටෙලිග්‍රෑම් (Telegram) වැනි සමාජ මාධ්‍ය සහ පණිවුඩ හුවමාරු වේදිකා හරහා ද වංචාකරුවන් පුද්ගලයන් වෙත ළඟා වේ. ඔවුන් එහිදී අන්තර්ජාලය හරහා ලිංගික සේවාවන් සැපයීම හෝ පෞද්ගලික සබඳතා ඇති කර ගැනීමට අවස්ථාව ලබා දෙන බව පවසයි. අනතුරුව, විශේෂිත ජංගම දුරකථන යෙදුමක් බාගත කර ස්ථාපනය (Install) කිරීමට වින්දිතයන්ව පොළඹවනු ලැබේ.

මෙම යෙදුම්, ඩේටින් ඇප් ලෙස පෙනුනද, ඒවා වින්දිතයන්ගේ ජංගම දුරකථනවල ආරක්ෂාව බිඳදමා ඔවුන්ගේ අන්තර්ජාල බැංකු තොරතුරු ලබා ගැනීමට නිර්මාණය කරන ලද ද්වේෂසහගත ‘APK’ ගොනු (Malicious APK files) විය හැකි බවට පොලිසිය අනතුරු අඟවා ඇත.

එහි ප්‍රතිඵලයක් ලෙස, මෙම ද්වේෂසහගත යෙදුම වින්දිතයන්ගේ දුරකථනවල ස්ථාපනය කර පවතින අතරතුර, ඔවුන් අන්තර්ජාලය හරහා මුදල් ගනුදෙනු සිදුකරන විට ඔවුන්ගේ මූල්‍ය ගිණුම්වලට අදාළ පරිශීලක නාම (Usernames) සහ මුරපද (Passwords) වෙත ප්‍රවේශය ලබා ගැනීමට වංචාකරුවන්ට හැකියාව ලැබේ. එමගින් වංචනික ලෙස මුදල් ලබා ගැනීමට ඔවුන් කටයුතු කරයි.

සමාජ මාධ්‍ය සහ පණිවුඩ හුවමාරු වේදිකා හරහා මූල්‍ය වංචා සිදුකිරීමට භාවිතා කරන ක්‍රමවේදයන් වේගයෙන් පරිණාමය වෙමින් පවතින බව පොලිසිය පවසයි. ඇතැම් වංචාකරුවන් ආදරය සහ මිත්‍රත්වය පිළිබඳ පොරොන්දු ලබා දෙමින් වින්දිතයන් රවටා, ඔවුන්ගේ මූල්‍ය තොරතුරු වෙත ප්‍රවේශය ලබා ගන්නා බවද පොලිසිය වැඩිදුරටත් සඳහන් කරයි.