පාදයේ පහළ වූ තුවාලයක් සඳහා රෝහල් ගතකර සිටි බද්දේගම පුද්ගලයකු වැඩිදුර ප්‍රතිකාර සඳහා කරාපිටිය රෝහලට මාරු කිරීමෙන් පසු පැය කිහිපයකට පසු හිසට බරපතළ තුවාල සිදුවී මිය ගොස් තිබේ.

බද්දේගම මීමැඩුම පදිංචි චිත්‍ර ශිල්පියකු සහ දෙදරු පියෙකු වන උපුල් තුෂාර (54) දණහිසට පහළින් ඇති වූ තුවාල සඳහා ප්‍රතිකාර ගැනීමට මුලින්ම බද්දේගම ප්‍රාදේශීය රෝහලට ඇතුළත් කර ඇත.

වැඩිදුර ප්‍රතිකාර සඳහා කරාපිටිය ශික්ෂණ රෝහලට මාරු කරන විට ඔහු සම්පූර්ණයෙන්ම සිහියෙන් යුතුව සිටි බව රෝහල් නිලධාරීන් ප්‍රකාශ කර තිබේ.

එහෙත් ගිලන් රථය කරාපිටියට ළඟා වන විට උපුල් සිහිසුන්ව සිට ඇත.

ඔහුව දැඩි සත්කාර ඒකකයට ගෙන ගිය නමුත් ප්‍රතිකාර ලබමින් සිටියදී මිය ගොස් තිබේ.

පශ්චාත් මරණ පරීක්ෂණය සිදුකළ අධිකරණ වෛද්‍ය නිලධාරී වෛද්‍ය එච්. මධුවන්ති ජයසිංහ නිගමනය කර ඇත්තේ, හිසට මාරාන්තික තුවාල සහ ශරීරයේ තවත් කොටස් කිහිපයකට ඇති වූ කම්පන අනුව, මෙම මරණය පාදයේ තුවාලයට වඩා හදිසි අනතුරක ප්‍රතිඵලයක් බවටයි.

මරණ පරීක්ෂක චන්ද්‍රසේන ලොකුගේ ඉදිරියේ පැවති මරණ පරීක්ෂණයේදී සාක්ෂි දුන් ඥාතීන් පැවසුවේ අකටයුතුකමක් සමබන්ධයෙන් තමන් සැක නොකරන බවයි.

එසේවුවද, පශ්චාත් මරණ පරීක්ෂණ සොයාගැනීම් මත පදනම්ව පරීක්ෂණයක් පවත්වන ලෙස මරණ පරීක්ෂකවරයා බද්දේගම පොලිසියට නියෝග කළේය.

පසුව ගිලන් රථ කාර්ය මණ්ඩලය පොලිසියට පවසා ඇත්තේ රෝගියා මීපාවල අසලදී ගමන් කරන ගිලන් රථයේ පිටුපස දොරෙන් පැන්න බවත්, ඒ අවස්ථාවේ මේ සම්බන්ධයෙන් රෝහල් බලධාරීන්ට දැනුම් දී නොමැති බවත්ය.

මරණ පරීක්ෂකවරයා ප්‍රකාශ සටහන් කර ගැනීම සඳහා කාර්ය මණ්ඩලය අද කැඳවා ඇත.

මේ අතර, දකුණු පළාත් සෞඛ්‍ය සේවා අධ්‍යක්ෂවරයා සිද්ධිය සම්බන්ධයෙන් විධිමත් පරීක්ෂණයක් පැවැත්වීමට නියෝග කර තිබේ.