මිද්දෙණිය, තලාව ප්‍රදේශයේ පිහිටි ඉඩමක සිදුකළ වැටළීමකදී සොයාගත් ‘අයිස්’ නිෂ්පාදනය සඳහා භාවිත කරන බවට විශ්වාස කෙරෙන රසායනික ද්‍රව්‍ය තොගයක් සම්බන්ධයෙන් අත්අඩංගුවට ගත් සැකකරුගෙන් ප්‍රශ්න කිරීම සඳහා පොලිසිය අද (07) රැඳවුම් නියෝග ලබාගෙන තිබේ.

ඒ අනුව, පියල් මනම්පේරි නම් සැකකරු අද (07) උදෑසන අධිකරණයට ඉදිරිපත් කිරීමෙන් පසු, ප්‍රශ්න කිරීම සඳහා වලස්මුල්ල මහේස්ත්‍රාත් අධිකරණය දින හතක රැඳවුම් නියෝගයක් නිකුත් කර තිබේ.

මිද්දෙණිය, තලාව ප්‍රදේශයේ ඉඩමක වළදමා තිබූ ‘අයිස්’ නිෂ්පාදනය සඳහා භාවිත කරන රසායනික ද්‍රව්‍ය කිලෝග්‍රෑම් 50,000 ක් පමණ පොලිසිය විසින් සොයාගන්නා ලදී.

සැප්තැම්බර් (05) දින බටහිර උතුර අපරාධ කොට්ඨාශය විසින් කරන ලද මෙහෙයුමකදී මෙම සොයාගැනීම සිදුකරන ලදී.

පොලිස් පරීක්ෂණවලින් හෙළිවූයේ පියල් මනම්පේරි සහ ඔහුගේ සහෝදර සම්පත් මනම්පේරි යන දෙදෙනාම රසායනික ද්‍රව්‍ය සැඟවීමට සම්බන්ධ බවට චෝදනා එල්ල වී ඇති බවත්, ඔවුන් මෑතකදී ඉන්දුනීසියාවේ ජකර්තාහිදී තවත් කල්ලි සාමාජිකයින් කිහිපදෙනකු සමඟ අත්අඩංගුවට ගත් කුප්‍රකට සංවිධානාත්මක අපරාධකරුවෙකු වන ‘කෙහෙල්බද්දර පද්මේ’ගේ සමීප මිතුරන් බවත්ය.

ඉන්දුනීසියාවේදී ද අත්අඩංගුවට ගත් ‘බැකෝ සමන්’ නමින් හැඳින්වෙන සැකකරුගෙන් ප්‍රශ්න කිරීමේදී, ‘කෙහෙල්බද්දර පද්මේ’ ‘අයිස්’ නිෂ්පාදනය සඳහා භාවිත කරන රසායනික ද්‍රව්‍ය තොගය රටට ආනයනය කළ බව ඔහු පාපොච්චාරණය කළ බව වාර්තා වේ.