කොවිඩ් වසංගතයේදී ආදාහනය කරන ලද පුද්ගලයන්ගේ, විශේෂයෙන් මුස්ලිම් රෝගීන්ගේ වාර්තා පවත්වා ගෙන යන ලෙස පාර්ලිමේන්තු මන්ත්‍රී රවුෆ් හකීම් පාර්ලිමේන්තුවේ දී රජයෙන් ඉල්ලා සිටියේය.

“තොරතුරු දැනගැනීමේ අයිතිය පිළිබඳ පනත පිටුපස සැඟවෙන්න එපා. කොවිඩ් නිසා මියගිය සහ ආදාහනය කළ මුස්ලිම් රෝගීන්ගේ විස්තර සපයන ලෙස අපි ඔබෙන් ඉල්ලා සිටිනවා. මේ ගැන විවෘතව සාකච්ඡා කළ යුතුයි” යනුවෙන් ප්‍රකාශ කරමින් හකීම් මන්ත්‍රීවරයා චෝදනා කළේ රජය තොරතුරු වසන් කරන බවටය.

මෙම සිද්ධිය රටේ සෞඛ්‍ය බලධාරීන්ට කැළලක් බවද ඔහු කියා සිටියේය.

හකීම් පසුගිය පාලනය විවේචනය කළේ නව රජය පත්වූයේ එවැනි වැරදි නිවැරදි කිරීමට බව සඳහන් කරමිනි.

එම ප්‍රශ්නයට පිළිතුරු දෙමින් සෞඛ්‍ය ඇමැති නලින්ද ජයතිස්ස කියා සිටියේ රජය කිසිදු ආකාරයකින් තොරතුරු වසන් කිරීමට උත්සාහ නොකරන බවයි.

“මෙය තොරතුරු වසන් කිරීමේ ප්‍රශ්නයක් නෙවෙයි; වෛද්‍ය ආචාර ධර්ම ගැන ප්‍රශ්නයක්. තොරතුරු දැනගැනීමේ අයිතිය යටතේ, රෝගියාගේ විස්තර හෙළිදරව් කිරීමට අවසර නැහැ, අපට මෙම තොරතුරු වසන් කිරීමට අයිතියක් නැහැ. එදා ආණ්ඩුව කැබිනට් තීරණ ගත්තේ විද්‍යාත්මක සාක්ෂි මත පදනම්ව නෙවෙයි කියලා ඔබ හොඳින් දන්නවා” යනුවෙන් ඇමැති ජයතිස්ස කීවේය.

කොවිඩ් වසංගතයට ගොදුරු වී ආදාහනය කළ අයගේ නම්, ලිපිනයන් සහ සමීප ඥාතීන් ප්‍රසිද්ධ කරන ලෙස හකීම් මන්ත්‍රීවරයා රජයෙන් ඉල්ලා සිටිමින් සඳහන් කළේ එය ආචාර ධර්ම ප්‍රශ්නයක් නොවන බවයි.

මේ අතර විපක්ෂ නායක සජිත් ප්‍රේමදාස අවධාරණය කළේ අදාළ තීරණයෙන් විපතට පත් පවුල්වලට සහ ප්‍රජාවන්ට වන්දි ලබාදිය යුතු බවයි.

කිසිදු තොරතුරක් වසන් කිරීමට අදහස් නොකරන බව යළිත් අවධාරණය කරමින් ඉල්ලා ඇති කරුණු නිකුත් කිරීම තීරණය කිරීම සඳහා නීතිපතිවරයා සමඟ සාකච්ඡා කරන බව රජය ප්‍රකාශ කළේය.

කොවිඩ් ආදාහන කටයුතු පිළිබඳ සාකච්ඡා කළ කමිටුවේ කොටස්කරුවන් වූ ඇතැම් නිලධාරීන් දැන් ඉහළ තනතුරුවලට පත් කර ඇති බව මේ සම්බන්ධයෙන් දෙපාර්තමේන්තු මට්ටමේ පරීක්ෂණයක්වත් පැවැත්විය යුතු බවත් හකීම් මන්ත්‍රීවරයා අවධාරණය කළේය.