November 13, 2025
ශ්‍රී ලංකාවේ සීනි කර්මාන්තය පුනර්ජීවනය කිරීමේ හදිසි අවශ්‍යතාවක් පවතින බවත්, එම උත්සාහය ආර්ථික තිරසාරභාවය සහ ග්‍රාමීය ජීවනෝපායන් සමඟ බැඳී ඇති ජාතික ප්‍රමුඛතාවක් බවත් කර්මාන්ත නියෝජ්‍ය අමාත්‍ය චතුරංග අබේසිංහ පවසයි.
දේශීයව නිෂ්පාදනය කරන ලද දුඹුරු සීනි කෙරෙහි මෑතකදී ඇති වූ මහජන අවධානය නියෝජ්‍ය අමාත්‍ය අබේසිංහ සමාජ මාධ්‍ය සටහනක් ඔස්සේ සඳහන් කර තිබිණි.
එහි වටිනාකම හඳුනාගැනීම සඳහා වෙළඳපොළ විවාදවලින් ඔබ්බට බලන ලෙස ඔහු ජනතාවගෙන් ඉල්ලා සිටියේය.
1980 ගණන්වල සීනි කර්මාන්තයේ ශක්තිමත් ක්‍රියාකාරිත්වය සිහිපත් කරමින් ඔහු සඳහන් කර තිබුණේ, උක් පර්යේෂණ ආයතනය වැනි ආයතනවල අඛණ්ඩ උත්සාහයන් නොතකා අකාර්යක්ෂමතාව, නොසළකා හැරීම සහ දූෂණය හේතුවෙන් එම ආයතන පරිහානියට පත් වූ බවයි.
මොණරාගල වැනි ප්‍රදේශවල පවුල් 100,000කට අධික සංඛ්‍යාවක් උක් වගාව මත යැපෙන බවත්, තවත් බොහෝ දෙනෙක් ඒ ආශ්‍රිත සැකසුම් ක්ෂේත්‍රයේ සේවය කරන බවත් නියෝජ්‍ය අමාත්‍ය අබේසිංහ පැවසීය.
දේශීය මත්පැන් අංශයට සහ කෘෂිකාර්මික තිරසාරභාවයට දායක වන එතනෝල් සහ කොම්පෝස්ට් පොහොර නිෂ්පාදනය කිරීමේදී මෙම කර්මාන්තය දක්වන කාර්යභාරය ද ඔහු ඉස්මතු කළේය.
“ලාභදායී, තාක්‍ෂණය හරහා කාර්යක්ෂම, දූෂණයෙන් තොර සහ ඉහළ අස්වැන්නක් ලබාදීම ආදිය මගින් ශ්‍රී ලංකා රජය සීනි කර්මාන්තය නැවත පණගැන්වීමට කැපවී සිටිනවා,” යනුවෙන් ඔහු පැවසීය.
වැට් බදු බලපෑම් සහ එතනෝල් වෙළඳාමේ වෙළඳපොළ හැසිරවීම ඇතුළු විවිධ අභියෝග ඇති බවත් මිල ස්ථාවර කිරීමට, විකුණුම් මාර්ග වැඩිදියුණු කිරීමට සහ ගොවීන්ගෙන් ස්ථාවර මිලදී ගැනීම් සහතික කිරීමට විවිධ උත්සාහයන් ක්‍රියාත්මක වෙමින් පවතින බවත් නියෝජ්‍ය අමාත්‍ය අබේසිංහ පැවසීය.
