රේගු නිෂ්කාශනයෙන් මුදා හරින ලද ස්ඵටික මෙතම්ෆෙටමින් හෙවත් අයිස් නිෂ්පාදනය සඳහා භාවිත කරන බව කියන රසායනික ද්‍රව්‍ය අඩංගු බහාලුම් දෙක සම්බන්ධයෙන් වාර්තාවක් කැඳවා ඇති බව රේගු අධ්‍යක්ෂ ජනරාල් සීවලි අරුක්ගොඩ පවසයි.

බහාලුම් ආනයනය කළේ කවුරුන්ද සහ අනුගමනය කළ ක්‍රියාවලීන් වැනි විස්තර සත්‍යාපනය කිරීම සඳහා වාර්තාවක් කැඳවා ඇති බව සීවලි අරුක්ගොඩ පැවසීය.

මේ සම්බන්ධයෙන් වාර්තාව ලැබුණු පසු මාධ්‍ය දැනුවත් කරන බව ඔහු තවදුරටත් පැවසීය.

මේ අතර, පොලිස් මාධ්‍ය ප්‍රකාශක සහකාර පොලිස් අධිකාරී වූට්ලර් පැවසුවේ රේගුවෙන් බහාලුම් මුදා හැරීම සම්බන්ධයෙන් අපරාධ පරීක්ෂණ දෙපාර්තමේන්තුව වෙනම පරීක්ෂණයක් ආරම්භ කර ඇති බවයි.

පොලිස්පති ප්‍රියන්ත වීරසූරියගේ නියෝගය මත විමර්ශනය ආරම්භ කර ඇති බව සහකාර පොලිස් අධිකාරී වූට්ලර් පැවසීය.

පොලිස් ආරංචි මාර්ගවලට අනුව, අයිස් මත්ද්‍රව්‍ය නිෂ්පාදනය සඳහා භාවිත කරන රසායනික ද්‍රව්‍ය අඩංගු බව කියන මෙම බහාලුම් ජනවාරි 27 වැනිදා කොළඹ වරායෙන් මුදා හැර ඇත.

පරීක්ෂණවලින් හෙළි වී ඇත්තේ මෙම බහාලුම් ජනවාරි 29 වැනිදා මිද්දෙනියට ප්‍රවාහනය කර ඇති බවයි.

අයිස් නිෂ්පාදනය සඳහා භාවිත කරන බව කියන රසායනික ද්‍රව්‍ය කිලෝග්‍රෑම් 50,000ක් පමණ මිද්දෙනියේ වළ දමා තිබූ ස්ථානයකින් මීට පෙර සොයා ගන්නා ලදී.

පසුව නෙටොල්පිටියෙන් ද එවැනිම රසායනික ද්‍රව්‍ය තොගයක් සොයා ගැනිණි.

ඉන්පසු, කඳාන ප්‍රදේශයේ නිවසක සහ ඒ අසල කුඹුරක තිබී සැක සහිත රසායනික ද්‍රව්‍ය කිලෝග්‍රෑම් 100කට වඩා සොයා ගන්නා ලදී.

ඉන්දුනීසියාවේදී අත්අඩංගුවට ගෙන ශ්‍රී ලංකාවට ගෙන එන ලද පාතාල නායක පානදුර නිලංගගේ සමීප මිතුරන් දෙදෙනෙකුගෙන් ලබාගත් තොරතුරු මත රසායනික ද්‍රව්‍ය තොග සොයා ගත් බව පොලිසිය පැවසීය.