August 31, 2026
ශ්රී ලංකා ජාතික ක්රිකට් ක්රීඩකයින්ගේ කොන්ත්රාත් ගිවිසුම් පදනම් කරගනිමින්, පුද්ගල ආදායම් බදු අය කිරීම සඳහා ඔවුන්ව ‘සේවකයින්’ ලෙස සැලකීමට දේශීය ආදායම් කොමසාරිස් ජනරාල්වරයා ගෙන තිබූ තීරණය බලරහිත කරමින් අභියාචනාධිකරණය අද රිට් ආඥාවක් නිකුත් කළේය. ඒ, ජාතික ක්රිකට් ක්රීඩකයින් කිහිපදෙනෙකු ඉදිරිපත් කළ පෙත්සම් සලකා බැලීමෙන් අනතුරුවය.
ඉඩම් ආදායම් පනතේ මෑතකදී සිදුවූ සංශෝධන මෙම නඩුවේ පාර්ශ්වයන්ට බලපාන්නේද යන්න පිළිබඳව අභියාචනාධිකරණය පසුගියදා දේශීය ආදායම් දෙපාර්තමේන්තුවෙන් පැහැදිලි කිරීමක් කැඳවා තිබූ අතර, ඉන් අනතුරුව මෙම තීන්දුව ප්රකාශයට පත් කර ඇත.
ශ්රී ලංකා ක්රිකට් ආයතනය සමඟ ඇති කරගෙන තිබෙන කොන්ත්රාත් ගිවිසුම් හේතුවෙන් ජාතික ක්රීඩකයින් ‘සේවකයින්’ ලෙස වර්ගීකරණය කිරීමට දේශීය ආදායම් දෙපාර්තමේන්තුව ගත් තීරණය මෙම නීතිමය ආරවුලට හේතු විය.
පෙර නඩු වාරවලදී ක්රිකට් ක්රීඩකයින් වෙනුවෙන් පෙනී සිටි නීතිඥවරුන් පෙන්වා දුන්නේ වසර 15කට වැඩි කාලයක් තිස්සේ ඔවුන්ව ස්වාධීන සේවා සපයන්නන් ලෙස සලකා ඇති බවත්, අපේක්ෂිත පුද්ගල ආදායම් බදු අය කරගැනීමේ අරමුණින් දේශීය ආදායම් දෙපාර්තමේන්තුව අත්තනෝමතික ලෙස ඔවුන්ව සේවකයින් ලෙස නැවත වර්ගීකරණය කර ඇති බවත්ය.
දේශීය ආදායම් පනතට පසුගියදා එකතු වූ සංශෝධනයක් මගින් ක්රීඩකයින් යනු අපේක්ෂිත පුද්ගල ආදායම් බදුවලට යටත් නොවන ‘ස්වාධීන සේවා සපයන්නන්’ ලෙස පැහැදිලිවම දක්වා තිබීමද මෙම නඩුවේදී විශේෂ අවධානයට ලක්විය.
කෙසේ වෙතත්, නියෝජ්ය සොලිසිටර් ජෙනරාල් මනෝහර ජයසිංහ නියෝජනය කළ දේශීය ආදායම් දෙපාර්තමේන්තුව අධිකරණය හමුවේ තර්ක කළේ මෙම සංශෝධනය අදාළ පෙත්සම්කරුවන්ට බලනොපාන බවත්, ශ්රී ලංකා ක්රිකට් ආයතනය සමඟ පවතින කොන්ත්රාත් සබඳතාව නිසා ජාතික ක්රිකට් ක්රීඩකයින් සේවකයින් ලෙස සැලකිය යුතු බවත්ය.
අභියාචනාධිකරණ සභාපති විනිසුරු රොහාන්ත අබේසූරිය සහ විනිසුරු කේ. ප්රියන්ත ප්රනාන්දුගෙන් සමන්විත විනිසුරු මඬුල්ල හමුවේ මෙම රිට් පෙත්සම් විභාගයට ගැනිණි.
