වයස අවුරුදු 15ක දැරියක් දූෂණය කිරීමේ චෝදනාවට වරදකරු වූ පුද්ගලයකු විසින් ගොනු කරන ලද අභියාචනයක් ප්‍රතික්ෂේප කරමින්, අභියාචනාධිකරණය ශ්‍රී ලංකාවේ ලිංගික ප්‍රචණ්ඩත්වය ඉහළ යෑම සහ සමාජයට එමගින් වන විනාශකාරී බලපෑම අවධාරණය කර තිබේ.

සසි මහේන්ද්‍රන් විනිසුරුවරයාගේ එකඟතාව ඇතිව අභියාචනාධිකරණ විනිසුරු අමල් රණරාජා අවධාරණය කළේ, ස්ත්‍රී දූෂණය “හුදෙක් අපරාධයක් නොව, ප්‍රජාවේ හදවතටම පහර දෙන ශාපයක්” බවයි.

එම වරද ජාතියේ සමාජ ව්‍යුහය මත අඳුරු සෙවනැල්ලක් අඛණ්ඩව රඳවන බව ඔහු සඳහන් කළේය.

ස්ත්‍රී දූෂණය වින්දිතයන් ගැඹුරු මානසික තුවාලවලට ගොදුරුවන අතර කාන්තාවන් අතර බිය ඇති කරන බවත්, යුක්තිය පසිඳලීමේ පද්ධතිය සහ සමාජය සැමට ආරක්ෂාව සහ ගෞරවය ආරක්ෂා කිරීම සඳහා තීරණාත්මකව ප්‍රතිචාර දැක්වීම අත්‍යවශ්‍ය කරන බවත් අධිකරණය සඳහන් කළේය.

වරද සිදු වූ අවස්ථාවේ විත්තිකරු වයස අවුරුදු 27ක විවාහක පිරිමියකු බවත්, වින්දිතයාගේ වයස අවුරුදු 15ක් පමණක් බවත් හෙළි විය.

මෙම සිදුවීම 2006 නොවැම්බර් 01 හෝ ඊට ආසන්න දිනකදී සහ 2006 දෙසැම්බර් 31 දින හලාවත අඩිප්පල හිදී සිදුව තිබේ.

නඩු විභාගයේදී ඉදිරිපත් කරන ලද DNA සාක්ෂි මගින් විත්තිකරු වින්දිතයාට උපන් දරුවාගේ පියා බව තහවුරු විය.

නීතිපතිවරයා 1995 අංක 22 දරණ දණ්ඩ නීති සංග්‍රහයේ (සංශෝධන) පනතේ 364(2) වගන්තිය යටතේ ස්ත්‍රී දූෂණ චෝදනා තුනක් සම්බන්ධයෙන් විත්තිකරුට චෝදනා ගොනු කර තිබිණි.

චූදිතයා චෝදනා තුනටම වරද පිළිගත් අතර පසුව හලාවත මහාධිකරණය විසින් එක් එක් චෝදනාව සඳහා වසර 18ක බරපතළ සිර දඬුවමක් නියම කර, දඬුවම් එකවර ක්‍රියාත්මක විය යුතු බවට නියෝග කළේය.

දඬුවමේ නීත්‍යනුකූලභාවය සහ බරපතළකම අභියෝගයට ලක් කරමින්, විත්තිකරු අභියාචනාධිකරණය ඉදිරියේ තර්ක කළේ දඬුවම් එකවර ක්‍රියාත්මක වූ බැවින්, වසර 18ක සිර දඬුවමක් දීම වැඩි බවයි.

කෙසේවෙතත්, අතිරේක සොලිසිටර් ජනරාල් ශනිල් කුලරත්න චෝදනා එල්ල කරන අවස්ථාවේ විත්තිකරු විශ්වසනීය තනතුරක සිටි බවත්, ඔහු බරපතළ ලෙස වගකීම් උල්ලංඝනය කළ බවත් ප්‍රකාශ කළේය.

අභියාචනය ප්‍රතික්ෂේප කරමින්, අභියාචනාධිකරණය තීරණය කළේ පනවන ලද දඬුවම නීති විරෝධී හෝ වැඩි දඬුවමක් නොවන බවයි.

ස්ත්‍රී දූෂණ සඳහා වරදකරුවන් වීමෙන් වින්දිතයන්ට පමණක් නොව සමස්ත සමාජයටම දුරදිග යන ප්‍රතිවිපාක ඇති වන බව අධිකරණය අවධාරණය කළේය.

බරපතළ ලිංගික අපරාධවල අපරාධකරුවන්ට නිසි ලෙස කටයුතු කිරීම යුක්තිය ආරක්ෂා කිරීමට සහ අනාගත අපරාධ වැළැක්වීමට අත්‍යවශ්‍ය වේ.

එම වකවානුවේ බාල වයස්කාරියක වූ වින්දිතයා, ගැඹුරු අවදානමක් සහ සූදානමක් නොමැති වයසේදී දරු ප්‍රසූතියේ බර ඇතුළු දරුණු ශාරීරික හා මානසික කම්පනයකට මුහුණ දී ඇති බව අධිකරණය තවදුරටත් සඳහන් කළේය.