දේශීය වෙළඳපොළේ පොල් මිල අඛණ්ඩව ඉහළ යෑමට ප්‍රධාන හේතුව රජයේ පොල් වෙන්දේසිවලදී අතරමැදියන් මිල නියම කිරීම බව පොල් වගා මණ්ඩලය පවසයි.

රජයේ ජ්‍යෙෂ්ඨ නිලධාරීන් සමඟ මෑතකදී සිදුකළ සාකච්ඡාවකදී, පොල් වගා මණ්ඩලයේ සභාපති ආචාර්ය සුනිමල් ජයකොඩි විසින් මෙම ගැටළුව මතුකර ඇත.

රජය සතු වතුවලින් පොල් අවම මිලට වෙන්දේසි කළද, අතරමැදියන් එම තොග මිලදීගෙන වෙළඳපොළේ ඉතා ඉහළ මිලකට අලෙවි කරමින් විශාල ලාභයක් ලබාගන්නා බවත්, මෙය පොල් වගාකරුවන්ට සහ පාරිභෝගිකයන්ට අසාධාරණ හා අවාසිසහගත බවත් ආචාර්ය ජයකොඩි පෙන්වා දී තිබේ.

පසුගිය වසරේ අගෝස්තු මාසයේ සිට පොල් අස්වැන්න පහත වැටුණද, අර්බුදකාරී තත්වයක් පෙන්නුම් කරන පොල් මිල රු. 200 ට වඩා ඉහළ මට්ටමක පවතින බව ඔහු තවදුරටත් පෙන්වාදී ඇත.

මැයි සහ ජුනි මාසවල මිලියන 555 ක පොල් අස්වැන්නක් ලැබෙනු ඇතැයි අනුමාන කළද, නිෂ්පාදනයේ අපේක්ෂිත වැඩිවීමක් තිබියදීත්, අඛණ්ඩව මිල ඉහළ යෑම පිළිබඳව ගැටළු මතු වූ බව සභාපතිවරයා පෙන්වා දී තිබේ.

ඊට විසඳුම් වශයෙන්, පොල් තොගයෙන් කොටසක් පමණක් වෙන්දේසි හරහා අලෙවි කළයුතු බවත්, ඉතිරි කොටස සතොස අලෙවිසැල් සහ සමුපකාර හරහා සහන මිලට මහජනතාව අතර බෙදාහැරිය යුතු බවද යෝජනා කර ඇත.

ජනාධිපති අනුර කුමාර දිසානායක, ඉහළ යන පොල් මිල ගණන් සැලකිල්ලට ගෙන ඇති අතර, මේ පිළිබඳව විමසීමෙන් මිල ස්ථාවර කිරීම සඳහා සැලැස්මක් සකස් කරන ලෙස කෘෂිකර්ම අංශයේ ඉහළ නිලධාරීන්ට උපදෙස් ලබා දී තිබේ.

එමෙන්ම, පොල් නිෂ්පාදනය ඉහළ නැංවීම සඳහා පොල් වගාකිරීමේ මණ්ඩලය ලබන මාසයේ සිට වැඩසටහන් කිහිපයක් ක්‍රියාත්මක කිරීමට සූදානම් බව පැවැසේ.

දැනට රජය සතුව පොල් අක්කර 100,000 කට ආසන්න ප්‍රමාණයක් තිබුණද, මෙම ඉඩම් බොහොමයක් අඩුවෙන් භාවිත කර ඇති බව සාකච්ඡාවේදී අනාවරණය වි ඇති අතර, රජය එම ඉඩම් සංවර්ධනය කෙරෙහි අවධානය යොමුකර ඇති බව ආචාර්ය ජයකොඩි වැඩිදුරටත් සඳහන් කර තිබේ.

ඉදිරි මාසවලදී පොල් අස්වැන්න නැවතත් පහත වැටිය හැකි බවත්, එය තවත් මිල ඉහළ යාමට හේතු විය හැකි බවත් සභාපතිවරයා අනතුරු අඟවා ඇත.