චීනය විසින් සිය දේශසීමා හරහා සිදුවන ජන සංක්‍රමණ පාලනය කිරීම සඳහා නව නීති මාලාවක් හඳුන්වා දීමට සූදානම් වීමත් සමඟ, චීනයේ සංචාරය කරන කණ්ඩායම් ආරක්ෂා කිරීම සහ ලියාපදිංචි කිරීම සඳහා අමතර පියවර ගන්නා ලෙස තායිවානයේ සංචාරක පරිපාලනය එරට සංචාරක ආයතන වෙත උපදෙස් දී තිබේ.

චීනය මෙම නව දේශසීමා රෙගුලාසි ක්‍රියාත්මක කිරීමට නියමිතව ඇත්තේ සැප්තැම්බර් 15 වනදා සිටය. මෙම වෙනස්කම් හේතුවෙන් චීනයට පැමිණෙන තායිවාන පුරවැසියන්ගේ පෞද්ගලික ආරක්ෂාවට එල්ල වන අවදානම ඉහළ යා හැකි බව තායිවානයේ ප්‍රධාන භූමි කටයුතු පිළිබඳ කවුන්සිලය පවසයි. විශේෂයෙන්ම අවදානමට ලක්විය හැකි පිරිස් වෙත තමන්ගේ සංචාරයන්හි අත්‍යවශ්‍යතාව නැවත සලකා බලන ලෙස උපදෙස් දී ඇති අතර, චීනය, හොංකොං සහ මැකාවු වෙත සංචාරය කරන තායිවාන ජාතිකයන් සඳහා වූ රජයේ පද්ධතිය හරහා තම සංචාරක තොරතුරු ලියාපදිංචි කරන ලෙසද දන්වා ඇත.

හදිසි අවස්ථාවකදී ඉක්මන් සහායක් ලබාදීමට මෙම ලියාපදිංචිය උපකාරී වන බව නිලධාරීහු පවසති. ඒ අනුව සංචාරක පරිපාලනය විසින් සංචාරක ආයතන වෙත නව උපදෙස් මාලාවක් යොමු කර ඇති අතර, චීනය බලා පිටත්වීමට පෙර සෑම කණ්ඩායමක් සඳහාම නියමිත පරීක්ෂණ ලේඛනයක් සම්පූර්ණ කිරීම අනිවාර්ය කර තිබේ. අධ්‍යයන චාරිකා, හුවමාරු වැඩසටහන් සහ ස්වයං-සංවිධානාත්මක සංචාරක කණ්ඩායම් සඳහාද බලපැවැත්වෙන මෙම නීතිය ඊයේ සිට ක්‍රියාත්මක විය.

මෙම උපදෙස් මාලාවට අනුව සංචාරක ආයතන විසින් චීනයේ සංචාරය කිරීමේදී ඇතිවිය හැකි අවදානම් පිළිබඳව සංචාරකයින් පැහැදිලිව දැනුවත් කළ යුතු අතර, රජයේ සංචාරක ලියාපදිංචි කිරීමේ ක්‍රියාවලිය සම්පූර්ණ කිරීමටද සහාය විය යුතුය.