දින තුනක් ඇතුළත, ඉන්දියාවේ මධ්‍ය ප්‍රදේශ් හි ළමුන් 122කට වැඩි පිරිසක් ඇස්වල ඇති වූ දරුණු තුවාල සහිතව රෝහල්වලට ඇතුළත් කර ඇති අතර ඉන් 14 දෙනෙකුට ඇස් පෙනීම අහිමි වී තිබේ.

ඉන්දීය මාධ්‍ය වාර්තා කළේ ‘කාබයිඩ් තුවක්කුව’ලෙස ප්‍රකට තුවක්කුවක් සමඟ සෙල්ලම් කිරීමෙන් දරුවන්ගේ ඇස්වලට මෙලෙස තුවාල සිදු වී ඇති බවයි.

‘දේශී රතිඤ්ඤා තුවක්කුව’ ලෙස ජනප්‍රියව හැඳින්වෙන මෙම තුවක්කු, දීපාවලි උත්සවයේ නවතම අංගයක් ලෙස දරුවන් හඳුන්වන අතර, එය මාපියන්ට සහ වෛද්‍යවරුන්ට බියකරු සිහිනයක් බවට පත්ව තිබේ.

ඔක්තෝබර් 18 වැනිදා නිකුත් කරන ලද රජයේ තහනම නොතකා, දේශීය වෙළඳපොලවල් මෙම ‘කාබයිඩ් තුවක්කු’ විවෘතව අලෙවි කළ විදිෂා දිස්ත්‍රික්කය මධ්‍ය ප්‍රදේශ් හි වඩාත් බලපෑමට ලක් වූ දිස්ත්‍රික්කයයි.

රුපියල් 150ත් 200ත් අතර මිලකට ලබා දී ඇති මෙම උපාංග සෙල්ලම් බඩු මෙන් සාදා විකුණනු ලැබුව ද ඒවා බෝම්බ මෙන් පුපුරා යයි.

“අපි ගෙදර හැදූ කාබයිඩ් තුවක්කුවක් මිලදී ගත්තා. එය පුපුරා ගියා, මගේ ඇසක් සම්පූර්ණයෙන්ම දැවී ගියා. මට කිසිවක් පෙන්නේ නැහැ” යැයි හමීඩියා රෝහලේ සුවය ලබමින් සිටින දාහතර හැවිරිදි නේහා කඳුළු සලමින් පැවසුවාය.

තවත් වින්දිතයකු වන රාජ් විශ්වකර්ම පැවසුවේ, “මම සමාජ මාධ්‍යවල වීඩියෝ දැකලා ගෙදරදී රතිඤ්ඤා තුවක්කුවක් හදන්න උත්සාහ කළා. ඒක මගේ මුහුණ ඉස්සරහම පිපිරුණා… ඒ නිසා මගේ ඇස නැති වුණා.”යනුවෙනි.

නීති විරෝධී ලෙස උපකරණ අලෙවි කිරීම සම්බන්ධයෙන් විදිෂා පොලිසිය හය දෙනෙකු අත්අඩංගුවට ගෙන තිබේ.

භෝපාල්, ඉන්දෝර්, ජබල්පූර් සහ ග්වාලියර් යන රෝහල්වල අක්ෂි වාට්ටු මෙම තුවක්කුවලින් තුවාල ලැබූ තරුණ රෝගීන්ගෙන් පිරී ඇත.

භෝපාල්හි හමීඩියා රෝහලට පමණක් පැය 72ක් තුළ ළමුන් 26 දෙනෙකු ඇතුළත් කර ඇත.

වෛද්‍යවරු මාපියන්ට අනතුරු අඟවන්නේ මෙය සෙල්ලම් බඩුවක් නොව, වැඩිදියුණු කළ පුපුරණ ද්‍රව්‍යයක් බවයි.

හමීඩියා රෝහලේ වෛද්‍ය මනීෂ් ෂර්මා පැවසුවේ, “මෙම උපකරණය ඇස්වලට සෘජුවම හානි කරනවා. පිපිරීමෙන් දෘෂ්ටි විතානය පුළුස්සා දමන ලෝහ කොටස් සහ කාබයිඩ් වාෂ්ප නිකුත් වෙනවා. ස්ථිර අන්ධභාවයට හේතු වන අවස්ථා කිහිපයකට අපි ප්‍රතිකාර කරමින් සිටිනවා.” යනුවෙනි.

සමහර රෝගීන් දැඩි සත්කාර ඒකකයේ ප්‍රතිකාර ලබන අතර, බොහෝ දෙනෙකුට කිසිදා සම්පූර්ණ පෙනීම නොලැබෙනු ඇත.

ළමුන් ප්ලාස්ටික් හෝ ටින් පයිප්ප භාවිතයෙන් ‘කාබයිඩ් තුවක්කුව’ සාදා, වෙඩි බෙහෙත්, ගිනි කූරු හිස් සහ කැල්සියම් කාබයිඩ්වලින් පුරවා, සිදුරක් හරහා එය දල්වන බව වාර්තා වේ.

එහි ඇත්තේ රසායනික ප්‍රතික්‍රියාවේ සහ කුතුහලයේ මාරාන්තික මිශ්‍රණයකි.

මිශ්‍රණය දැල්වෙන විට, එය පිපිරීමක් ඇති කරන අතර එමගින් සුන්බුන් සහ දැවෙන වායුව තල්ලු කරන බැවින් බොහෝ විට මුහුණට සහ ඇස්වලට කෙලින්ම පහර වැදේ.

පොලිසිය පවසන්නේ තුවක්කු දේශීය පොළවල් සහ පාර අයිනේ කඩ කාමරවල ‘කුඩා කාලතුවක්කු’ ලෙස විකුණනු ලබන අතර, කිසිදු ආරක්ෂක රෙගුලාසියක් නොමැති බවයි.