රඹුක්කන පොලිසිය ප්‍රදේශයේ දුරකථන සම්ප්‍රේෂණ කුළුණකින් කේබල් සොරකම් කිරීම සම්බන්ධයෙන් පුද්ගලයෙකු අත්අඩංගුවට ගෙන ඇති අතර, එම ස්ථානයෙන් සොරකම් කළ බවට විශ්වාස කෙරෙන තඹ වයර් කිලෝග්‍රෑම් 13 කට වැඩි ප්‍රමාණයක් අත්අඩංගුවට ගෙන තිබේ.

රඹුක්කන ප්‍රදේශයේ පදිංචි 31 හැවිරිදි පුද්ගලයකු ලෙස හඳුනාගෙන ඇති මෙම සැකකරු 2025 දෙසැම්බර් 9 වැනි අඟහරුවාදා අත්අඩංගුවට ගෙන ඇත.

රඹුක්කන පොලිස් වසමේ යටගම තල්හේන්කන්ද ප්‍රදේශයේ පිහිටි කුළුණක සිදු වූ සොරකම සම්බන්ධයෙන් සිදු කරන ලද විමර්ශනයකින් පසුව මෙම අත්අඩංගුවට ගැනීම සිදුකර ඇත.

රඹුක්කන පොලිසිය සිද්ධිය සහ සැකකරු සම්බන්ධයෙන් වැඩිදුර පරීක්ෂණ පවත්වයි.

මෑත කාලීන ආපදා තත්ත්වයෙන් පසු අත්‍යවශ්‍ය සන්නිවේදන සේවා යථාතත්ත්වයට පත්කිරීමේ උත්සාහයන්ට කේබල් සොරකම් දැඩි ලෙස බාධාකරන බව සඳහන් කරමින් බලධාරීන් මහජනතාවට අනතුරු ඇඟවීමක් කර ඇත.

ප්‍රවේශවීමට අපහසු ප්‍රදේශවල සහ කුළුණුවලට හානි වී ඇති හෝ ප්‍රතිසංස්කරණය කරමින් පවතින ස්ථානවල මෙම සොරකම් සිදුවන බව වාර්තා වේ.

“මෙවැනි කේබල් සොරකම් දුරකථන සහ අන්තර්ජාල සම්බන්ධතා කඩිනමින් යථාතත්ත්වයට පත්කිරීමට බරපතල බාධාවක් වන බැවින්, සැක සහිත පුද්ගලයන් නිරීක්ෂණය කළහොත්, වහාම ඔබේ ළඟම ඇති පොලිසියට දැනුම් දෙන්න,”යැයි පොලිසිය නිවේදනයක් මගන් මහජනතාවට උපදෙස් දී ඇත.