2026 වර්ෂයේදී ක්‍රියාත්මක කිරීමට නියමිත නව අධ්‍යාපන ක්‍රියාවලිය සඳහා වන මාර්ගෝපදේශ ලබන අගෝස්තු මාසයේදී නිකුත් කිරීමට නියමිත බව අධ්‍යාපන අමාත්‍යාංශය නිවේදනය කර ඇත.

මීට අදාළ රැස්වීමක් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් මහරගම ජාතික අධ්‍යාපන ආයතනයේ (NIE) පැවැත්විණි.

මෙම නව ප්‍රතිසංස්කරණය යටතේ ගුරු පුහුණුව සඳහා අවශ්‍ය පියවර පිළිබඳව ප්‍රධාන සාකච්ඡාව සිදුවිය.

රැස්වීම අතරතුර, 2026 දී 1 සහ 6 ශ්‍රේණි සඳහා නව විෂය නිර්දේශයක් හඳුන්වාදෙන බවත්, 10 ශ්‍රේණියට 2028 වන විට නව විෂය නිර්දේශයක් අනුගමනය කරන බවත් අග්‍රාමාත්‍යවරිය සඳහන් කළාය.

සාමාන්‍ය පෙළ විභාගය 2029 සිට යාවත්කාලීන කරන ලද විෂය මාලාව යටතේ පවත්වනු ලබන අතර, ඊට අමතරව, 9 ශ්‍රේණියේ සිට වෘත්තීය අධ්‍යාපනය හඳුන්වාදීමට නියමිතය.

ජාතික අධ්‍යාපන ආයතනයේ සෑම දෙපාර්තමේන්තු ප්‍රධානියෙක්ම සිය අංශ හරහා මෙම අධ්‍යාපන ප්‍රතිසංස්කරණ ක්‍රියාත්මක කිරීම සඳහා එහි පවතින වත්මන් ප්‍රගතිය සහ සැලසුම් පිළිබඳව අග්‍රාමාත්‍යවරිය දැනුවත් කර ඇත.

විෂය නිර්දේශ සංශෝධනය, ගුරු පුහුණුව, පරිපාලන හා යටිතල පහසුකම් සැපයීම, ඵලදායී ප්‍රජා සම්බන්ධතා ක්‍රියාවලියක් සංවර්ධනය කිරීම සහ මහජන සහභාගීත්වය සහතික කිරීම යන ප්‍රධාන කරුණු පහක් මත එය පදනම් වී ඇති බව අග්‍රාමාත්‍යවරිය අවධාරණය කළාය.

නව අධ්‍යාපනයේ ඉල්ලීම් සපුරාලීම සඳහා ධනාත්මක ආකල්ප සහිත ගුරුවරුන් පෝෂණය කිරීමේදී ජාතික අධ්‍යාපන ආයතනයේ වගකීම පිළිබඳවද ඇය අවධාරණය කර ඇත.

මෙම ප්‍රතිසංස්කරණ සිදුකරන ආකාරය සනාථ කරන ලෙසත්, නව මුලපිරීම් සමඟ අධීක්ෂණය සහ ඇගයීම සඳහා විධිමත් පද්ධතියක් ස්ථාපිත කරන ලෙසත් අග්‍රාමාත්‍යවරිය නිලධාරීන්ට උපදෙස් ලබාදී ඇත.