බංග්ලාදේශ වේග පන්දු යවන ක්‍රීඩක මුස්තෆිසුර් රහ්මාන් වහාම සංචිතයෙන් නිදහස් කරන ලෙස ඉන්දීය ක්‍රිකට් පාලක මණ්ඩලය කොල්කටා නයිට් රයිඩර්ස් කණ්ඩායමට නියෝග කර තිබේ.

මෙම නියෝගය සිදුකර ඇත්තේ 2026 ඉන්දීය ප්‍රිමියර් ලීග් (IPL) තරගාවලිය ආරම්භ වීමට නියමිතව තිබියදීය.

බංග්ලාදේශයේ හින්දු සුළු ජාතීන්ට එරෙහි මෑත කාලීන ප්‍රචණ්ඩත්වය සම්බන්ධයෙන් ඉන්දියාවේ වැඩෙන කණස්සල්ල මධ්‍යයේ ඉන්දීය ක්‍රිකට් පාලක මණ්ඩල ලේකම් දේවජිත් සයිකියා විසින් තහවුරු කරන ලද මෙම උපදෙස පැමිණ තිබිණි.

ඉන්දීය ක්‍රිකට් පාලක මණ්ඩල ලේකම් දේවජිත් සයිකියා ප්‍රකාශ කළේ ‘සෑම තැනකම සිදුවන මෑත කාලීන වර්ධනයන්’ හේතුවෙන් කොල්කටා නයිට් රයිඩර්ස් කණ්ඩායමට මෙම වේග පන්දු යවන්නා නිදහස් කරන ලෙස උපදෙස් දීමට මණ්ඩලය පෙළඹවූ බවයි.

දේශපාලන නායකයන් සහ ආගමික සංවිධානවල දැඩි ප්‍රතිචාරයක් හේතුවෙන් මෙම තීරණය ගෙන ඇත.

ද්විපාර්ශ්වික සබඳතා පළුදු වී තිබියදී බංග්ලාදේශ ක්‍රීඩකයකු ලබා ගැනීම සම්බන්ධයෙන් භාරතීය ජනතා පක්ෂ සහ ශිවසේනා නායකයන් ඇතුළු කැපී පෙනෙන පුද්ගලයන් කොල්කටා නයිට් රයිඩර්ස් සම හිමිකරු ෂාරුක් ඛාන් ප්‍රසිද්ධියේ විවේචනය කර තිබිණි.

චෙන්නායි සුපර් කිංග්ස් සහ දිල්ලි කැපිටල්ස් සමඟ තරඟකාරී ලංසු තැබීමකින් පසු 2025 දෙසැම්බර් මාසයේ කුඩා වෙන්දේසියේදී කොල්කටා නයිට් රයිඩර්ස් විසින් මුස්තාෆිසුර් රහ්මාන් සැළකිව යුතු මුදලකට එනම් රුපියල් කෝටි 9.20කට අත්පත් කර ගන්නා ලදී.

ඔවුන්ගේ ලැයිස්තුවේ ඇති පුරප්පාඩුව පිරවීම සඳහා විදේශීය ආදේශකයක් සෙවීමට කොල්කටා නයිට් රයිඩර්ස්හට අවසර දෙන බව ඉන්දීය ක්‍රිකට් පාලක මණ්ඩලය පැහැදිලි කර ඇත.

2026 වෙන්දේසියේ තෝරාගත් එකම බංග්ලාදේශ ක්‍රීඩකයා වන මුස්තාෆිසුර් ඉවත් කිරීම, ක්‍රිකට් නොවන හේතූන් මත පාලක මණ්ඩලය IPL කළමනාකරණයට මැදිහත්වීමේ දුර්ලභ අවස්ථාවක් සනිටුහන් කරයි.

පසුගිය මාසයේ මයිමෙන්සිං හි හින්දු පුද්ගලයකුගේ මරණය සහ පසුව වාර්ගික ප්‍රචණ්ඩත්වය පිළිබඳ වාර්තා ලැබීමෙන් පසු ඉන්දියාව සහ බංග්ලාදේශය අතර සබඳතා පිරිහී ඇත.

බංග්ලාදේශ ක්‍රීඩකයකු සංචිතයේ රැඳී සිටියහොත් කොල්කටාවේ තරඟ කඩාකප්පල් කරන බවට ආගමික නායකයන් සහ දේශපාලන ක්‍රියාකාරීන් තර්ජනය කර තිබිණි.

බංග්ලාදේශ ක්‍රිකට් ක්‍රීඩකයන්ට නිල තහනමක් නොමැති බව ඉන්දීය ක්‍රිකට් පාලක මණ්ඩලය මුලදී කියා සිටියද, නවතම නියෝගයෙන් යෝජනා කරන්නේ මෙය තරඟාවලියේ ස්ථාවරත්වය සහතික කිරීම සඳහා පූර්වාරක්ෂාකාරී පියවරකට මාරුවීමක් බවයි.

කෙටි දැනුම්දීමකින් උසස් තත්ත්වයේ වමත් වේග පන්දු යවන්නකු සොයා ගැනීමේ අභියෝගයට කොල්කටා නයිට් රයිඩර්ස් දැන් මුහුණ දී සිටී.

විශේෂයෙන් 2016 සිට ඔහුගේ පුළුල් IPL අත්දැකීම් සැළකිල්ලට ගෙන, මුස්තාෆිසුර් ඔවුන්ගේ පන්දු යැවීමේ ප්‍රහාරයේ කුළුණක් වනු ඇතැයි කොල්කටා නයිට් රයිඩර්ස් අපේක්ෂා කර තිබිණි.