November 3, 2025
ශ්‍රී ලංකා ක්‍රිකට් ක්‍රීඩකයන්ට කෙටි කාලයකට හෝ සමාජ මාධ්‍ය සම්පූර්ණ තහනමක් පැනවිය යුතු බව ශ්‍රී ලංකා හිටපු නායක මාවන් අතපත්තු පවසයි.
අන්තර්ජාලය ක්‍රීඩකයන්ගේ අවධානයට සහ වෘත්තීයභාවයට බලපාන බවට ඔහු තර්ක කරයි.
රට නියෝජනය කරන ක්‍රිකට් ක්‍රීඩකයන් පුහුණුව සහ කාර්ය සාධනය කෙරෙහි ඔවුන්ගේ සම්පූර්ණ අවධානය යොමු කළ යුතු බවත්, අවම වශයෙන් යම් කාලයක් සමාජ මාධ්‍යවලින් ඈත්ව සිටීම ක්‍රීඩකයන්ට අවධානය සහ කැපවීම නැවත ලබා ගැනීමට උපකාරී වනු ඇති බවත් අතපත්තු පැවසීය.
“ක්‍රීඩකයන්ට සමාජ මාධ්‍ය අවශ්‍ය යැයි හැඟේ නම්, ඔවුන් ක්‍රිකට් ක්‍රීඩාවෙන් විශ්‍රාම ගත යුතුයි. ඔබ රට නියෝජනය කරන විට, ඔබේ අවධානය යොමු විය යුත්තේ ඔබේ කාර්ය සාධනය සහ සූදානම කෙරෙහි පමණයි” ඔහු පැවසීය.
ශ්‍රී ලංකාව සියලුම ආකෘතීන් හරහා මෙහෙයවූ සහ රටේ වඩාත්ම විනයගරුක ක්‍රීඩකයකු ලෙස අතපත්තු සැළකේ.
ඔහු තවදුරටත් සඳහන් කළේ ශ්‍රී ලංකාවේ ක්‍රීඩා විලාසය දුර්වල බැවින් ටෙස්ට් තරග පවා අහිමිවෙමින් පවතින බවයි.
වසර එකහාමාරක කාලයක් සඳහා ශ්‍රී ලංකාවට ලැබී ඇත්තේ ටෙස්ට් තරග 4ක් පමණක් බව ඔහු පෙන්වා දෙයි.
ශ්‍රී ලංකාවට ටෙස්ට් තරග නොලැබීම නිසා තරග ලබා ගැනීමට වෙනත් රටවල් පසුපස යෑමට සිදුව ඇති බව ද ඔහු සඳහන් කළේය.
