අස්ගිරි පාර්ශවයේ අනුනායක ධුරය සඳහා වන ඡන්ද විමසීම අද (අගෝස්තු 28) පස්වරු 2.00 ට මහනුවර අස්ගිරි මහා විහාරයේ ඓතිහාසික ‘පොහොය ගෙය’ හිදී පැවැත්වේ.

අස්ගිරි පාර්ශවයේ මහානායක අතිපූජ්‍ය වරකාගොඩ ශ්‍රී ඥානරතන හිමියන්ගේ අනුශාසකත්වයෙන් මෙම ඡන්ද විමසීම පැවැත්වේ.

‘අස්ගිරි කාරක මහා සංඝ සභාවේ’ මුළු සාමාජිකයන් 19 දෙනකු මෙම ඡන්ද විමසීමේදී ඡන්දය ප්‍රකාශ කිරීමට සුදුසුකම් ලබා ඇත.

ජුනි 20 වැනි දින වයස අවුරුදු 67 දී අපවත් වූ අතිපූජ්‍ය ආණමඩුවේ ධම්මදස්සි හිමියන්ගෙන් පසු මෙම තනතුර පුරප්පාඩු විය.

ඒ අනුව, ‘අස්ගිරි කාරක මහා සංඝ සභාවේ’ ජ්‍යෙෂ්ඨ සාමාජිකයන් දෙදෙනකු වන මහියංගණ රජමහා විහාරාධිපති පූජ්‍ය උරුලවත්තේ ධම්මරක්ඛිත හිමියන් සහ අස්ගිරි පාර්ශවයේ නියෝජ්‍ය ලේඛකාධිකාරී පූජ්‍ය නාරම්පනාවේ ආනන්ද හිමියන් යන දෙදෙනාම එම තනතුර සඳහා අපේක්ෂකයන් ලෙස තම නම් ඉදිරිපත් කර ඇත.