චොකලට්වලට දැඩි ඇල්මක් දැක්වූ 67 හැවිරිදි පුද්ගලයෙකු පේරාදෙණියේ කඩයකින් චොකලට් සොරකම් කළ බවට චෝදනා කරමින් අමානුෂික ලෙස පහර දී ඝාතනය කර තිබේ.

මෙම මාරාන්තික ප්‍රහාරය සිදුකළේ පුද්ගලයන් දෙදෙනෙකු බව පොලිසිය පවසයි.

සිද්ධිය සම්බන්ධයෙන් කඩයේ හිමිකරු සහ ඔහුගේ සේවකයකු අත්අඩංගුවට ගෙන තිබේ.

67 හැවිරිදි අදාළ පුද්ගලයා පේරාදෙණියේ ඊරියගම පදිංචිකරුවකු වන අතර දරුවන් දෙදෙනකුගේ පියෙකි.

ඔහුගේ දරුවන් විවාහ වී වෙනත් ප්‍රදේශවල පදිංචි වූ පසු ඔහු තම බිරිඳ සමඟ ජීවත් වී ඇත.

ඔහු ආහාර ද්‍රව්‍ය මිලදී ගැනීමට නගරයට ගිය විට, කඩයේ සිටි පිරිමින් දෙදෙනෙකු ඔහුව කඩයට ඇදගෙන ගොස් ඔහුට පහර දී ඇත්තේ පෙර දින ඔහු චොකලට් සොරකම් කරන ආකාරය වෙළඳසැලේ සීසීටීවී වල සටහන් වී තිබූ බැවිනි.

පරීක්ෂණවලින් හෙළිවූයේ ඔහු මුදල් අසිරුතාවලින් පෙළෙන බවත්, චොකලට් මිලදී ගැනීමට වත්කමක් නොමැති බවත්, චොකලට් කෑමට ඇති ඔහුගේ දැඩි ආශාව නිසා ඔහු සොරකම් කිරීමට පෙළඹුණු බවත්ය.

නගරයට යන සෑම අවස්ථාවකම ඔහුට සහ ඔහුගේ බිරිඳට චොකලට් මිලදී ගැනීමේ පුරුද්දක් ඔහු සතුව තිබී ඇත.

පහරදීමෙන් පසු සැකකරුවන් ඔහුව කඩය වසාදමන තුරු එහි තබාගෙන, පසුව මාර්ගය අයිනේ දමාගොස් ඇති බව පොලිසිය පවසයි.

ඒ අසලින් ගිය කාන්තාවක් අසාධ්‍ය තත්ත්වයෙන් පසුවූ ඔහුව හඳුනාගෙන රෝහල්ගත කර ඇත.

කෙසේවෙතත්, මියයෑමට පෙර සිද්ධිය සම්බන්ධයෙන් ප්‍රකාශයක් කිරීමට ඔහුට හැකි වී තිබේ.