ලංකා මිල්ක් ෆුඩ් සමාගම සිය අඹේවෙල ෆාම්ස් වෙතින් දිනකට කිරි ලීටර් 62,000ක වාර්තාගත කිරි නිෂ්පාදනයක් අත්පත් කර ගෙන තිබේ.

සමාගමට අනුව, දිනකට වාර්තා කරන ලද ලීටර් 3,000 සිට ලීටර් 60,000 දක්වා ඉහළ යෑම සැබවින්ම දැවැන්ත වර්ධනයක් නියෝජනය කරයි.

2001 දී සමාගම රාජ්‍ය අංශයෙන් මෙම අඹේවෙල ගොවිපොළ පවරා ගන්නා විට ආරම්භයේ දී දෛනික නිෂ්පාදනය පැවතී ඇත්තේ ලීටර් 3000ට අඩුවෙනි.

දැන් එය ශ්‍රී ලංකාවේ ජාතික සැපයුමට වාර්ෂිකව කිරි ලීටර් මිලියන 20ක් දායක කරයි.

මෙම ජයග්‍රහණය වසර ගණනාවක් තිස්සේ සිදුකළ සූක්ෂම සැලසුම් කිරීම, සැළකිව යුතු ආයෝජන සහ නව්‍ය ගොවිතැන් පිළිවෙත් ක්‍රියාවට නැංවීමේ ප්‍රතිඵලයක් යැයි ලංකා මිල්ක් ෆුඩ් සමාගම පවසයි.

නවීකරණය සඳහා රුපියල් බිලියන 5ක ආයෝජනයක එක් අංගයක් ලෙස ස්වයංක්‍රීය කිරිදෙවීමේ පද්ධති දෙකක් හඳුන්වාදීමත් සමඟ 2019 දී සමාගම ප්‍රධාන සන්ධිස්ථානයක් ළඟා විය.

මෙම පද්ධති වසර දෙකක් ඇතුළත නිෂ්පාදන ධාරිතාව දෙගුණ කළ අතර ඒ යටතේ එම ගොවිපොළ ලෝක මට්ටමේ ප්‍රමිතීන්ට පැමිණ තිබිණි.

ගොවිපොළේ සාර්ථකත්වය යටිතල පහසුකම්වලින් පමණක් නොව චින්තනය හේතුවෙන් සිදුවූවක් බව සමාගම කියයි.

ගෝලීය වශයෙන් ප්‍රසිද්ධියට පත් ගවයන්ගේ ශුක්‍ර තරලය යොදා ගනිමින් උසස් අභිජනන වැඩසටහනක් දේශීයව සිදුකර ඉහළ අස්වැන්නක් ලබාදෙන එළදෙනුන් නිෂ්පාදනය කිරීමට හැකි වී තිබේ.

ලොව පුරා සිටින හොඳම වාණිජ ගව පට්ටි හා සැසඳිය හැකි මෙම ජානමය වශයෙන් උසස් ගවයින් දින 305ක කිරි දෙන චක්‍රයකට ලීටර් 12,000ක් නිපදවයි.

තවද, දැඩි සෞඛ්‍ය නිරීක්ෂණ සහ රෝග වැළැක්වීමේ පියවරයන් මගින් ගව රංචුව සෞඛ්‍ය සම්පන්නව සහ රෝගවලින් තොරව, ඵලදායිතාව පවත්වා ගැනීමට හැකි වී තිබේ.

මෙම ඉහළ අස්වැන්න පවත්වා ගැනීම සඳහා පෝෂණය ද වැදගත් කාර්යභාරයක් ඉටුකර ඇත.

මේ යටතේ අන්තර්ජාතික පෝෂණවේදීන්ගේ මගපෙන්වීම ඇතිව ගවයන්ගේ අවශ්‍යතා සපුරාලීම සඳහා සකස් කරන ලද නිවැරදි පෝෂණ පද්ධති භාවිත කරයි.

මීට අමතරව, ගොවිපළේ තණබිම් සඳහා ආනයනය කර වගා කරන ලද තෘණ වර්ග පෝෂණය සඳහා යොදා ගනී.

මෙහි ප්‍රතිඵලයක් ලෙස අඹේවෙල ගොවිපළේ දිනකට සාමාන්‍යයෙන් එළදෙනකුගෙන් කිරි ලීටර් 40ක් දක්වා නිෂ්පාදනය කරයි.

මෙම ජයග්‍රහණය පිළිබඳව අදහස් දක්වමින් සමාගමේ කිරි ගොවිපොළ භාර සාමාන්‍යාධිකාරී සරත් බණ්ඩාර පැවසුවේ, දේශීය කණ්ඩායම්වල දැනුම සහ කැපවීම සමඟ අන්තර්ජාතික විශේෂඥතාව මුසු කරමින් සහයෝගී ප්‍රවේශයක් තුළින් මෙම සන්ධිස්ථානය ලබා ගැනීමට හැකි වී තිබෙන බවයි.