August 31, 2025
මහජන මුදල් මහා පරිමාණයෙන් අවභාවිත කිරීම සහ අපරාධ ක්‍රියාවන්ට සම්බන්ධ බවට එල්ල වී ඇති චෝදනා මැද හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන ඇතුළු පසුගිය පාලන සමයේ ප්‍රධානීන් සම්බන්ධයෙන් රජය පරීක්ෂණ තීව්‍ර කර ඇති බව වාර්තා වේ.
මෙය සිදුවන්නේ හිටපු ජනාධිපති රනිල් වික්‍රමසිංහ අත්අඩංගුවට ගැනීම, රක්ෂිත බන්ධනාගාරගත කිරීම සහ පසුව ඇප මත නිදහස් කිරීමෙන් දින කිහිපයකට පසුවය.
මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල පැවසුවේ සියලුම ප්‍රධාන ඉහළ පෙළේ නඩු රජයේ විශේෂිත කණ්ඩායම් යටතේ ක්‍රියාකාරී විමර්ශනයකට භාජනය වෙමින් පවතින බවයි.
“කීත් නොයාර් සම්බන්ධයෙන් වන සියලු විමර්ශන අපි දැන් අවසන් කරමින් සිටින්නේ. තුන්වැනි වරටත් ප්‍රධාන මහේස්ත්‍රාත් අධිකරණයට සාක්ෂි ඉදිරිපත් කර තිබෙනවා, වාර්තාව දැනටමත් නීතිපතිවරයා වෙත ඉදිරිපත් කර තියෙන්නේ,” යැයි ඔහු පැවසීය.
“ප්‍රගීත් එක්නැලිගොඩගේ නඩුව ද විභාග වෙමින් පවතිනවා, විමර්ශනයට ලක්ව ඇත්තේ රාජපක්ෂ පවුලට සම්බන්ධ එකම පුද්ගලයන් කණ්ඩායමක්. විනාශ වූ සාක්ෂි එක රැයකින් ලබා ගත නොහැකි වුණත් අපි ගැඹුරටම යන්න කැපවී සිටිනවා,” යනුවෙන් ද ඔහු පැවසීය.
පාස්කු ඉරිදා ප්‍රහාර පිළිබඳ පරීක්ෂණ අඛණ්ඩව සිදුවෙමින් පවතින බවත්, නඩුවේ සංවේදී ස්වභාවය නිසා මේ අවස්ථාවේ වැඩිදුර තොරතුරු නිකුත් නොකරන බවත් අමාත්‍ය විජේපාල තවදුරටත් පැවසීය.
එවැනි ඉහළ පෙළේ පරීක්ෂණ හැසිරවීමට රජයට ඇති හැකියාව පිළිබඳ ගැටළුව වන්නේ විමර්ශන දෙපාර්තමේන්තු තුළ කාර්ය මණ්ඩලයේ හිඟය හේතුවෙන් ඇති වන අභියෝග බව අමාත්‍යවරයා පිළිගත්තේය.
“මගේ අමාත්‍යාංශය යටතේ ඇති සියලුම දෙපාර්තමේන්තු රජයේ මුදල් විශාල ප්‍රමාණයක් අයථා ලෙස පරිහරණය කිරීම ඇතුළු ප්‍රධාන දූෂණ නඩු සම්බන්ධයෙන් පරීක්ෂණ කටයුතු කිරීම නිසා කාර්යබහුලයි. අපි සීමිත කාර්ය මණ්ඩලයක් සමඟ වැඩ කරන්නේ, සමහර පරීක්ෂණවල ප්‍රගතියේ සුළු ප්‍රමාදයක් තියෙනවා,” යැයි ඔහු පැහැදිලි කළේය.
‘කුඩා’ සහ ‘විශාල’ දූෂණ විමර්ශනය කිරීම අතර ඇති විෂමතාව පිළිබඳ කණස්සල්ලට හේතු දක්වමින්, පරිමාණය කුමක් වුවත්, දූෂණය දූෂණයක් බව අමාත්‍ය විජේපාල අවධාරණය කළේය.
“දූෂණ විරෝධී පනතට අනුව, අල්ලසක් යනු අපරාධයක්, එයට රු. 100ක් හෝ මිලියන ගණනක් ඇතුළත් වෙන්න පුළුවන්. වැරදි දේ කවුරු කළත් වැරදියි,” ඔහු පැවසීය.
“සමහර අය විශාල මුදල් ප්‍රමාණයක් සොරකම් කරත් එය වාර්තා වෙන්නේ නැහැ. තවත් අවස්ථාවක දී, කුඩා මුදල් ප්‍රමාණයක් සොරකම් කරත් මහජන අවධානය වැඩියි. නීතිය ක්‍රියාත්මක කරන නිලධාරීන් අපරාධයේ පරිමාණය මත නෙවෙයි පැමිණිලි සහ සාක්ෂි මත පදනම්වයි විමර්ශනය කරන්නේ.”යැයි ඔහු පැහැදිලි කළේය.
පාස්කු ඉරිදා ප්‍රහාර පිටුපස සිටින මහ මොළකරු තමා දන්නා බවට හිටපු ජනාධිපති සිරිසේන කළ ප්‍රකාශය පිළිබඳ අදහස් දක්වමින් අමාත්‍ය විජේපාල පැවසුවේ “ඔහුට එරෙහිව තවත් චෝදනා තිබෙනවා, ඒ සියල්ල පරීක්ෂා කරනවා. සියල්ල සූදානම් වූ පසු, අපරාධ පරීක්ෂණ දෙපාර්තමේන්තුවට ප්‍රකාශයක් ලබා දීම සඳහා ඔහුව කැඳවයි.” යනුවෙනි.
සැළකිව යුතු මහජන අවධානයක් දිනාගෙන ඇති නැනෝ-පොහොර නඩුව ද විමර්ශනයට ලක්ව ඇත.
පරීක්ෂණ අවසන් කිරීමට රජයට වැඩි කාලයක් අවශ්‍ය බව අමාත්‍යවරයා සඳහන් කළේය.
“එකවර හැසිරවීමට ඕනෑවට වඩා නඩු තිබෙනවා. වර්තමානයේ, පරීක්ෂණ දෙපාර්තමේන්තුවෙන් තුනෙන් දෙකක් සාක්ෂි සැපයීමට දිනපතා අධිකරණයට එනවා,” යැයි ඔහු අනාවරණය කළේය.
ජාතික ජන බලවේගය බලයට පත්වීමට පෙර සිදු වූ විමර්ශනවලට අදාළ ලිපිගොනු අඛණ්ඩ පරීක්ෂණ සඳහා භාවිත කරන බව විජේපාල තහවුරු කළේය.
“අපි දැන් ඒ සියලු නඩු විභාග කරමින් සිටිනවා, කාලයත් සමඟ තවත් බොහෝ අත්අඩංගුවට ගැනීම් සිදුවෙයි. ජනාධිපති අනුර කුමාර දිසානායක විපක්ෂයේ සිටියදී සඳහන් කළ නම් ද ඔබට පරීක්ෂා කරන්න පුළුවන්,” ඔහු පැවසීය.
පොලිසියේ මෙහෙයුම්වලට රජය මැදිහත් නොවන බව අමාත්‍ය විජේපාල පැහැදිලි කළේය.
“අපි පොලිසියට කොන්දේසි නියම කිකරන්නේ නැහැ. පැමිණිල්ලක් ලැබුණු ඕනෑම තැනක, පොලිසිය විමර්ශනය කරයි. සමහර විට නඩු අධිකරණයේ තියෙද්දී ක්‍රියාවලියට කාලය ගත වෙනවා, නමුත් අපි යුක්තිය ඉටු කිරීමට අධිෂ්ඨාන කරගෙන ඉන්නේ,” ඔහු පැවසීය.
හිටපු ජනාධිපති වික්‍රමසිංහ වැනි ප්‍රමුඛ පුද්ගලයන් අත්අඩංගුවට ගැනීම සම්බන්ධයෙන් ද අමාත්‍යවරයා සැලකිලිමත් වූ අතර, සමහර අත්අඩංගුවට ගැනීම් දේශපාලනීකරණය වී තිබුණද, රජය අධිකරණයේ අධිකාරියට ගරු කළ බව පැවසීය.
“රනිල් වික්‍රමසිංහ නඩුවේදී, අධිකරණය තීන්දුව ප්‍රකාශයට පත් කිරීමට පෙර පැය හතකට ආසන්න කාලයක් දෙපාර්ශ්වයටම සවන් දුන්නා. අධිකරණයේ අධිකාරිය ප්‍රශ්න කිරීම ඥානවන්ත නැහැ. තම සේවාදායකයන්ට ඇප ලබා ගැනීම නීතිඥයන්ගේ යුතුකමක්. අධිකරණ තීන්දු ප්‍රශ්න කිරීමේ මෙම සංස්කෘතිය වෙනස් විය යුතුයි,” ඔහු තවදුරටත් පැවසීය.
සිරගතව කාලය ගත කිරීම වෙනුවට රෝහල්වල වෛද්‍ය ප්‍රතිකාර ලබා ගැනීමෙන් වගවීමෙන් වැළකී සිටින පුද්ගලයන්ගේ ගැටලුව ද විජේපාල ඉස්මතු කළේය.
“දඬුවම් නොලබා ක්‍රියා කරන අයව අපි ආරක්ෂා කරන්නේ නැහැ. අපරාධයක් සිදුවී ඇති බව පරීක්ෂණවලින් හෙළි වුවහොත්, වගකිවයුත්තන් අත්අඩංගුවට ගත යුතුයි. බන්ධනාගාර දැනටමත් පිරී ඉතිරී ගොස් තිබෙනවා, අපට එතවත් පුද්ගලයන් නිකන් යවන්න අවශ්‍ය නැහැ. කෙසේවෙතත්, සිරගත කිරීමට සුදුසු අය වැරදිවලට වගකිව යුතුයි,” ඔහු අවධාරණය කළේය.
(The Sunday Morning)
