July 20, 2023
ජනාධිපති රනිල් වික්‍රමසිංහගේ නවදිල්ලි සංචාරයේදී, දෙරට අතර අන්තර්ජාතික ගනුදෙනු සඳහා ඇමෙරිකානු ඩොලරය වෙනුවට ඉන්දීය රුපියල භාවිත කිරීම සම්බන්ධයෙන් ඉන්දීය බලධාරීන් සමඟ අවබෝධතා ගිවිසුමක් අත්සන් කිරීමට හෙට දිනයේදී(21) බලාපොරොත්තු වන බව ඉන්දියානු ජනමාධ්‍ය වාර්තා කරයි.
ඉන්දීය අගැමති නරේන්ද්‍ර මෝදි සමඟ ද්විපාර්ශ්වික සාකච්ඡා සඳහා ජනාධිපතිවරයා සිය ප්‍රථම නිල සංචාරය අරඹමින් හෙට ඉන්දියාවට පැමිණෙනු ඇත.
ඉන්දීය රුපියල අන්තර්ජාතික මුදල් ඒකකයක් ලෙස නම් කිරීමට ඉන්දීය සංචිත බැංකුවේ අනුමැතිය බලාපොරොත්තුවෙන් සිටින බව ශ්‍රී ලංකා මහ බැංකුව මීට පෙර නිවේදනය කළේය.
ඉන්දියානු රුපියල සමඟ ගනුදෙනු – RuPay කාඩ්පත සහ RuPay යාන්ත්‍රණය – ඉන්දියාව විසින් ප්‍රවර්ධනය කරනු ලැබේ.
මීට අමතරව, පුනර්ජනනීය බලශක්ති ක්ෂේත්‍රයේ ද්විපාර්ශ්වික සහයෝගීතාවය සහ ත්‍රිකුණාමලය ඛනිජ තෙල් මධ්‍යස්ථානයක් ලෙස සංවර්ධනය කිරීම සඳහා තවත් අවබෝධතා ගිවිසුම් දෙකක් මෙම සංචාරයේදී හුවමාරු කර ගැනීමට නියමිත බව පැවැසේ.
ත්‍රිකුණාමලය තෙල් ටැංකි සංකීර්ණය සංවර්ධනය කිරීම සහ පුනර්ජනනීය බලශක්ති ක්ෂේත්‍රයේ ආයෝජන සඳහා ඉන්දියාව දැනටමත් පියවර ආරම්භ කර ඇත.
