කිසියම් ආයෝජනයක් සම්බන්ධයෙන් රජය සහ ආයෝජකයන් අතර ඇති වන ආරවුලකදී අගතියට පත් පාර්ශ්වයන් විසින් නීතිමය ක්‍රියාමාර්ග ගැනීමට පෙර ඒ සඳහා මැදිහත් වීමට, විමර්ශනය කිරීමට සහ විසඳීම සඳහා විශ්‍රාමික විනිසුරුවරුන්ගෙන් සමන්විත අර්ධ අධිකරණමය ආයතනයක් ලෙස ජාතික ආයෝජන ආරක්ෂණ කවුන්සිලයක් පිහිටුවීමට රජය යෝජනා කර තිබේ.

ඉදිරි මාස දෙක තුළ පාර්ලිමේන්තුවට හඳුන්වා දීමට නියමිත ආයෝජන ආරක්ෂණ පනත යටතේ මෙම යෝජනාව ගෙන එනු ඇත.

දේශීය හා විදේශීය ආයෝජකයන් සතු ආයෝජන සහ ව්‍යවසායන් අත්තනෝමතික ලෙස ජනසතු කිරීමට එරෙහිව ඒවා ආරක්ෂා කිරීම ආයෝජන ආරක්ෂණ පනත අරමුණයි.

යෝජිත ජාතික ආයෝජන ආරක්ෂණ කවුන්සිලය ආරවුල් විසඳීම සඳහා වේදිකාවක් ලෙස ක්‍රියා කරන අතර විනිශ්චය සභාවකට සමානව නඩුවෙන් නඩුවට ක්‍රියාත්මක වනු ඇත.

ආයෝජකයන්ගේ විශ්වාසය ඉහළ නැංවීම සහ දේශීය හා විදේශීය ආයෝජන ඉහළ මට්ටමකට ආකර්ෂණය කර ගැනීමේ අරමුණින් මෙම පනත හඳුන්වා දීමට නියමිතය.

විදෙස් ආයෝජන ශ්‍රේණිගත කිරීම්වල සහ ව්‍යාපාර කිරීමේ පහසුව පිළිබඳ දර්ශකවල ශ්‍රී ලංකාවේ තත්ත්වය වැඩිදියුණු කිරීම, ආයෝජක ආරවුල් සහ බේරුම්කරණ හිමිකම් අඩු කිරීම, ප්‍රතිපත්තිමය විශ්වසනීයත්වය සහ පුරෝකථනය කිරීමේ හැකියාව ශක්තිමත් කිරීම සහ අන්තර්ජාතික ප්‍රමිතීන් සහ හොඳම භාවිතයන් සමඟ ශ්‍රී ලංකාවේ ආයෝජන රාමුව පෙළගැස්වීම එහි අරමුණයි.

මෙම වසරේදී ශ්‍රී ලංකාවට අමෙරිකානු ඩොලර් බිලියන 1ක ආයෝජනයක් ලැබුණද, නීතිමය ආරවුල්වලට තුඩු දෙන ප්‍රතිපත්ති නොමැතිකම වැනි බාධක ඉවත් කිරීමෙන් එම මුදල තවත් ඉහළ නංවා ගත යුතු බව භාණ්ඩාගාර නිලධාරියෙක් පවසා තිබිණි.

පනත් කෙටුම්පත කඩිනමින් නීති කෙටුම්පත්කරු වෙත යවන බවත්, පසුව අනුමැතිය සඳහා නීතිපතිවරයා වෙත යවන බවත් ඔහු සඳහන් කර ඇත.