ඉන්දියාවේදී සහ ශ්‍රී ලංකාවේදී පැවැත්වීමට නියමිත ICC කාන්තා ක්‍රිකට් ලෝක කුසලානය සඳහා සංශෝධිත කාලසටහනක් ICCය විසින් ප්‍රකාශයට පත් කර තිබේ.

සැප්තැම්බර් 30 වැනිදා ආරම්භ වන කණ්ඩායම් අටකින් යුත් තරඟාවලිය සඳහා ස්ථාන පහෙන් එකක් ලෙස බෙංගාලෝර් වෙනුවට නවී මුම්බායි ආදේශ කර ඇත.

නොවැම්බර් 2 වැනිදා පැවැත්වෙන 13 වැනි කාන්තා ක්‍රිකට් ලෝක කුසලානයේ ලීග් තරඟ තුනක්, අවසන් පූර්ව තරඟයක් සහ ඇතැම් විට අවසන් තරඟය ද ඇතුළත් වන තරඟ පහක් නවී මුම්බායි හි DY පටිල් ක්‍රීඩාංගණයේ දී පැවැත්වෙනු ඇත.

සැප්තැම්බර් 30 සිට නොවැම්බර් 2 දක්වා තරඟාවලි දිනයන් නොවෙනස්ව පවතින අතර අනෙකුත් ස්ථාන වන ගුවහාටි හි ACA ක්‍රීඩාංගණය, ඉන්දෝර් හි හොල්කර් ක්‍රීඩාංගණය, විශාකාපට්නම් හි ACA-VDCA ක්‍රීඩාංගණය සහ කොළඹ R. ප්‍රේමදාස ක්‍රීඩාංගණය ද නොවෙනස්ව පවතී.

නවී මුම්බායි හි ක්‍රීඩාංගණය කාන්තා ක්‍රිකට් සඳහා වඩාත් සුදුසු බව ICC සභාපති ජේ ෂා විශ්වාස කරයි.

“නවී මුම්බායි මෑත වසරවලදී කාන්තා ක්‍රිකට් සඳහා සැබෑ නිවහනක් ලෙස ඉස්මතු වී තිබෙනවා. අන්තර්ජාතික තරඟාවලි සහ කාන්තා ප්‍රිමියර් ලීග් තරඟාවලියේදී ලැබුණු සහයෝගය කැපී පෙනෙනවා, එය ක්‍රීඩකයන් උසස් කරන සහ රසිකයන් ප්‍රබෝධමත් කරන වාතාවරණයක් නිර්මාණය කරනවා,” යැයි ඔහු පැවසීය.

“කාන්තා ක්‍රීඩා ගමනේ තීරණාත්මක මොහොතක අපි සිටින්නෙ. මෙම ලෝක කුසලානය ඉන්දියාවේ පමණක් නොව ලෝකය පුරා ක්‍රිකට් ක්‍රීඩාවේ අනාගතය හැඩගස්වනවා.” යනුවෙන් ද ඔහු පැවසීය.

“අනපේක්ෂිත තත්වයන් නිසා කාලසටහන සකස් කර එක් ස්ථානයක් වෙනස් කරන්න අපට සිද්ධ වුණත්, කාන්තා ක්‍රීඩාවේ හොඳම දේ ප්‍රදර්ශනය කරන ලෝක මට්ටමේ ක්‍රීඩාංගණ පහක පෙළගැස්මක් දැන් තිබීම ගැන අපි සතුටු වෙනවා. වේදිකාව සකසා තිබෙන්නේ, මෙම තරඟාවලිය නව පරම්පරාවේ රසිකයන්ට ආශ්වාදයක් ලබා දෙනු ඇතැයි මම විශ්වාස කරනවා” යැයි ඔහු පැවසීය.

තරඟාවලියේ අවසන් මහා තරගය නොවැම්බර් 2 වැනිදා කොළඹ හෝ නවී මුම්බායි හිදී පැවැත්වෙනු ඇත.

පළමු අවසන් පූර්ව තරගය ඔක්තෝබර් 29 වැනිදා ගුවහාටි හෝ කොළඹදී සහ දෙවැනි අවසන් පූර්ව තරගය ඔක්තෝබර් 30 වැනිදා නවී මුම්බායි හිදී පැවැත්වීමට නියමිතය.