August 18, 2025
නියෝජ්‍ය අමාත්‍යවරයකුට එරෙහිව විශ්වාසභංග යෝජනාවක් ගෙනඒමට සිදුකළ ක්‍රියාවලියේ ගැටළු පවතින බව විපක්ෂය පිළිගෙන ඇතැයි සමගි ජන බලවේගයේ පාර්ලිමේන්තු මන්ත්‍රී රෝහණ බණ්ඩාර පවසයි.
ජනමාධ්‍ය වෙත අදහස් දක්වමින් මන්ත්‍රීවරයා පැවසුවේ මෙම ගැටළුව විසඳීමට සහ විකල්ප ප්‍රවේශයක් ඔස්සේ ආරක්ෂක නියෝජ්‍ය අමාත්‍ය අරුණ ජයසේකරට එරෙහිව චෝදනා ඉදිරිපත් කිරීමට කටයුතු කරමින් සිටින බවයි.
මෙම විශ්වාසභංග යෝජනාව ජයග්‍රහණය නොකරනු ඇතැයි විපක්ෂය දන්නා බවත්, මෙම කාරණය සම්බන්ධයෙන් සමාජය දැනුවත් කිරීම කෙරෙහි අවධානය යොමුකළ යුතු බවත් ඔහු වැඩිදුරටත් පැවසීය.
නියෝජ්‍ය අමාත්‍යවරයෙකුට එරෙහිව විශ්වාසභංගයක් ගෙන ආ නොහැකි බවට රජය සහ ඇතැම් නීති විශාරදයන් තර්ක ඉදිරිපත් කර තිබේ.
එහෙත් සමගි ජනබලවේගයේ සාමාජිකන් ප්‍රතිචාර දක්වා ඇත්තේ, එවැනි යෝජනාවක් ඉදිරිපත් කළ හැකි බවයි.
පසුගිය සතියේ විපක්ෂය විසින් ආරක්ෂක නියෝජ්‍ය අමාත්‍ය අරුණ ජයසේකරට එරෙහිව විශ්වාසභංග යෝජනාව කථානායක ජගත් වික්‍රමරත්න වෙත භාරදුන් අතර, ඔහු ඒ සම්බන්ධයෙන් හෙට සිය මතය ප්‍රකාශ කිරීමට නියමිතය.
2019 පාස්කු ඉරිදා ත්‍රස්ත ප්‍රහාරයේ විමර්ශනවලට නියෝජ්‍ය අමාත්‍යවරයාගේ පවතින සම්බන්ධය සහ ඔහු ඒ සම්බන්ධයෙන් සිදුකරන මැදිහත්වීම සම්බන්ධයෙන් ගැටලු පවතින බවට බරපතළ අවධානයක් යොමුකරමින් විශ්වාසභංග යෝජනාව ඉදිරිපත් කිරීමට විපක්ෂය තීරණය කර තිබිණි.
වව්නතිව් පොලිස් ඝාතන සහ සයින්දමරුදු පිපිරීම ඇතුළු පාස්කු ඉරිදා ත්‍රස්ත ප්‍රහාරයට සම්බන්ධ ප්‍රධාන සිද්ධීන්වලදී, බෝම්බ ප්‍රහාරයන්ට පෙර සිදුව තිබූ තීරණාත්මක සිදුවීම්වලදී අරුණ ජයසේකර නැඟෙනහිර ආරක්ෂක සේනා ආඥාපතිවරයා ලෙස කටයුතු කිරීම සම්බන්ධයෙන් කරුණු දක්වමින් ඔවුන් මෙම විශ්වාසභංගය ඉදිරිපත් කර තිබේ.
මේ වනවිට ආරක්ෂක අමාත්‍යාංශයේ ප්‍රබල තනතුරක් දරන ඔහු එම ප්‍රහාරය සම්බන්ධයෙන් දැනට සිදුකෙරෙන පරීක්ෂණවලට සම්බන්ධ නිලධාරීන්ට හෝ සාක්ෂිකරුවන්ට බලපෑම් කිරීමේ අවධානමක් පවතින බව ද එහි වැඩිදුරටත් සඳහන් වේ.
