නිලධාරීන්ගේ දැඩි හිඟයකට මුහුණ දී සිටින නීතිපති දෙපාර්තමේන්තුව විසින් අතිරේක පත්වීම් සඳහා කළ විධිමත් ඉල්ලීමකට, රාජ්‍ය සේවා කොමිෂන් සභාව මාස හතරකට වැඩි කාලයක් ප්‍රතිචාර දැක්වීමට අපොහොසත් වීම නිසා ගැටලුවකට මුහුණ දී සිටින බව වාර්තා වේ.

නීතිපති පාරින්ද රණසිංහ විසින් ලිඛිත අභියාචනයක් මගින්, දෙපාර්තමේන්තුව ශක්තිමත් කිරීම සඳහා තවත් නිලධාරීන් 25 දෙනෙකු අනුමත කරන ලෙස රාජ්‍ය සේවා කොමිෂන් සභාව ඉල්ලා ඇත්තේ දැනට නිලධාරීන් 97 දෙනෙකු පමණක් අපරාධ නඩු කටයුතු කරගෙන යන පසුබිමකයි.

නීතිපතිවරයා පවසන්නේ දෙපාර්තමේන්තුව තුළ පීඩනය තීරණාත්මක මට්ටම් කරා ළඟා වෙමින් පවතිනඅතර එක් එක් නිලධාරියාට නඩු 300කට වඩා වැඩි බරක් දැරීමට සිදුව ඇති බවයි.

අධික වැඩ බර තිබියදීත්, මෙම නිලධාරීන්ගේ වේතනය අඩු මට්ටමක පවතින බැවින් එය චිත්ත ධෛර්යය පිළිබඳ ගැටළු වැඩි කරයි.

ඊට අමතරව, පළපුරුදු නිලධාරීන්ට විදේශ රටවලින් අවස්ථා හිමිවීම දෙපාර්තමේන්තුවේ අර්බුදය තවත් උග්‍ර කරන බව රණසිංහ පිළිගත්තේය.

“අපගේ හොඳම නිලධාරීන් රට හැර යමින් සිටිනවා, රාජ්‍ය සේවා කොමිෂන් සභාවේ අක්‍රියතාවයත් සමඟ තත්වය වඩාත් දුෂ්කර වෙමින් තිබෙන්නේ,” යැයි ඔහු පිළිගත්තේය.

රජයේ ප්‍රධාන නීති උපදේශකවරයා වන නීතිපතිවරයා, අමාත්‍යාංශ, ව්‍යවස්ථාපිත මණ්ඩල සහ රාජ්‍ය සංස්ථා සඳහා නීතිමය කටයුතු සම්බන්ධයෙන් උපදෙස් දීම, අපරාධ නඩු පැවරීම සහ අධිකරණ සහ විනිශ්චය සභාවලදී රජය නියෝජනය කිරීම සඳහා වගකිව යුතුය.

සංකීර්ණ අපරාධ කාරණා සම්බන්ධයෙන් ඔහු මඟ පෙන්වීමක් ද සපයයි.