ලංකා ගමනාගමන මණ්ඩලයේ ලාභ ලබන බස් ඩිපෝ සඳහා ප්‍රසාද දීමනාවක් ලබාදෙන බව ප්‍රවාහන අමාත්‍ය බිමල් රත්නායක පවසයි.

ඒ සඳහා ලාභ උපයන ව්‍යාපාර ආකෘතිය සකස් කර ඇති බව ද ඔහු පැවසීය.

හැටන් ඩිපෝවට පහසුවෙන් ලාභ ලැබිය හැකි නමුත් අනවශ්‍ය ගැටළුකාරී තත්වයන් හේතුවෙන් ඒ සඳහා බාධා එල්ලවන බව ඔහු පෙන්වාදුන්නේය.

ප්‍රසාද දීමනා සෘජුවම ගෙවනු ලබන්නේ ලංකා ගමනාගමන මණ්ඩලයට නොව ලාභ ලබන බස් ඩිපෝවලට පමණක් බව ද අමාත්‍ය බිමල් රත්නායක පැහැදිලි කළේය.

“විශ්‍රාම වැටුපක් සහිතව විශ්‍රාම යාමට පෙර අවම වශයෙන් රුපියල් 100,000 දක්වා වැටුප් වැඩි කිරීමට උත්සාහ කරනවා. එය කළ හැකියි. අපි වරාය සහ ගුවන් සේවා ක්ෂේත්‍රයට ප්‍රසාද දීමනා ලබාදීම ආරම්භ කර තිබෙනවා,” ඔහු ලංගම නිලධාරීන්ට පැවසීය.

ඉදිරි වසර තුළ ලංගම සහ පෞද්ගලික බස් රථ මෙහෙයුම් දෙකම ඒකාබද්ධ කිරීමට සැලැස්මක් සකස් කරන ලෙස ද ප්‍රවාහන අමාත්‍යවරයා ලංකා ගමනාගමන මණ්ඩලයට උපදෙස් දුන්නේය.

අමාත්‍ය බිමල් රත්නායක මෙම අදහස් පළ කළේ ලංගම සහ පෞද්ගලික බස් රථ නිලධාරීන් සමඟ පැවති සාකච්ඡාවකදීය.