2025 අගෝස්තු 06 වැනි දින පැවැති රැස්වීමේදී, උසස් තනතුරු පිළිබඳ පාර්ලිමේන්තු කමිටුව තානාපතිවරයකු, අමාත්‍යාංශ ලේකම්වරුන් දෙදෙනකු සහ සභාපතිවරුන් 4 දෙනෙකුගේ පත්කිරීම අනුමත කර ඇත.

ඒ අනුව, ඕමාන රාජ්‍යයේ ශ්‍රී ලංකා තානාපතිවරයා ලෙස විජේසිංහ ආරච්චිගේ කපිල සංජීව ද අල්විස්ගේ නාමයෝජනාව කමිටුව අනුමත කර ඇත.

ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීමේ අමාත්‍යාංශයේ ලේකම් ලෙස එම්.ඒ.එල්.එස්.එන්.කේ. මන්ත්‍රිනායකගේ සහ කර්මාන්ත හා ව්‍යවසායකත්ව සංවර්ධන අමාත්‍යාංශයේ ලේකම් ලෙස ජේ.එම්. තිලකා ජයසුන්දරගේ පත්වීම් ද උසස් තනතුරු පිළිබඳ කමිටුව අනුමත කර ඇත.

තවද, ලංකා බැංකුවේ සභාපති ලෙස කාවින්ද ද සොයිසා, ස්වාධීන රූපවාහිනී ජාලයේ සභාපති ලෙස ප්‍රියන්ත වෙදමුල්ල, හෝටල් සංවර්ධක (ලංකා) සමාගමේ සභාපති ලෙස ප්‍රවීර් ඩී. සමරසිංහ සහ මධ්‍යම ඉංජිනේරු උපදේශන කාර්යාංශයේ සභාපති ලෙස ජයතිස්ස අනන්ත පතිරණගේ යන පත්වීම්ද උසස් තනතුරු පිළිබඳ කාරක සභාව විසින් අනුමත කර ඇත.