August 13, 2025
විල්පත්තු අභයභූමිය අසල ඉල්මනයිට් කැණීම් ස්ථානයක මෙහෙයුම් සිදුකිරීමට හේතුවූයේ ඛනිජ වැලි පිළිබඳ ජාතික ප්‍රතිපත්තියක් නොමැතිකම බව කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති පවසයි.
එම ස්ථානයට කළ නිරීක්ෂණ චාරිකාවකදී, වලාන පරිසර දූෂණ පාලන ඒකකය ඉල්මනයිට් කැණීම් ස්ථානයේ මෙහෙයුම් නතර කිරීමට මැදිහත් වී ඇති බව අමාත්‍යවරයා හෙළිකළේය.
කර්මාන්ත අමාත්‍යාංශය, ආයෝජන මණ්ඩලය, භූ විද්‍යා සමීක්ෂණ හා පතල් කාර්යාංශය, පරිසර අමාත්‍යාංශය සහ අනෙකුත් අදාළ ආයතන සමඟ සහයෝගයෙන් ඛනිජ පිළිබඳ ජාතික ප්‍රතිපත්තියක් දැනට සකස්කරමින් පවතින බව අමාත්‍ය හඳුන්නෙත්ති පැවසීය.
නුදුරු අනාගතයේ දී ක්‍රියාත්මක කිරීමට නියමිත ප්‍රතිපත්තිමය තීරණ රටේ ඛනිජ ආර්ථිකය ශක්තිමත් කරනු ඇතැයි ශ්‍රී ලංකා රජය විශ්වාස කරන බව ඔහු තවදුරටත් සඳහන් කළේය.
පුත්තලම දිස්ත්‍රික්කයේ පාර්ලිමේන්තු මන්ත්‍රීවරුන්, පරිසර අමාත්‍යාංශයේ නිලධාරීන්, භූ විද්‍යා සමීක්ෂණ හා පතල් කාර්යාංශය සහ අනෙකුත් රාජ්‍ය නිලධාරීහු නිරීක්ෂණ චාරිකාවට සහභාගී වූහ.
