චිත්‍රපට අධ්‍යක්ෂක සෝමරත්න දිසානායක ලෙස පෙනී සිටිමින් තරුණියන්ගෙන් නිරුවත් වීඩියෝ ලබාගත් පුද්ගලයකු පොල්ගහවෙලදී අත්අඩංගුවට ගෙන තිබේ.

සෝමරත්න දිසානායක විසින් අපරාධ පරීක්ෂණ දෙපාර්තමේන්තුවේ සයිබර් අපරාධ ඒකකයට කරන ලද පැමිණිල්ලක් මත සිදු කරන ලද විමර්ශනවලින් පසුව සැකකරු හඳුනාගෙන තිබිණි.

පොලිස් පරීක්ෂණවලින් හෙළි වූයේ එම පුද්ගලයා සෝමරත්න දිසානායකගේ නම භාවිත කරමින් ව්‍යාජ ෆේස්බුක් ගිණුමක් නිර්මාණය කර ඇති බවයි.

එමගින් රඟපෑමට චරිත ලබා දෙන බවට පොරොන්දු වෙමින් තරුණියන් සම්බන්ධ කර ගෙන ඇති බවත්, ඔවුන්ගේ නිරුවත් ඡායාරූප සහ වීඩියෝ ලබාගෙන ඇති බවත් පරීක්ෂණවලදී හෙළි වී තිබේ.

වැඩිදුර පරීක්ෂණවලින් හෙළි වී ඇත්තේ පොල්ගහවෙල ප්‍රදේශයේ පදිංචි 26 හැවිරිදි මෙම පුද්ගලයා 2023 සිට මෙම ක්‍රියාවේ නිරත වී ඇති බවයි.

වයස අවුරුදු 20ත් 35ත් අතර කාන්තාවන් 20කට ආසන්න පිරිසකින් ඔහු පැහැදිලි ඡායාරූප සහ වීඩියෝ ලබාගෙන තිබේ.

සැකකරු පොල්ගහවෙලදී අත්අඩංගුවට ගෙන ඇති අතර, පොලිසිය වින්දිත කාන්තාවන් 06 දෙනෙකුගෙන් ප්‍රකාශ සටහන් කරගෙන ඇත.

ප්‍රශ්න කිරීම්වලදී, ව්‍යාජ ෆේස්බුක් ගිණුම හරහා කාන්තාවන් සම්බන්ධ කර ගත් බවත්, වීඩියෝ සහ ඡායාරූප ලබා ගැනීමට යොදාගත් WhatsApp අංකයත් ඔහු විසින් හෙළිකර තිබේ.