දේශීය කර්මාන්තශාලා හතරක නිෂ්පාදනය කරන ලද දුඹුරු සීනි විකිණීමට නොහැකි වීම හේතුවෙන් රජය අර්බුදයකට මුහුණ දී සිටින බව වාර්තා වේ.

ඒ අනුව ගබඩා කර ඇති රහසිගත තොග වෙළඳපොළට මුදා හැරීමේ මාෆියාවක් ඇත් දැයි සොයා බැලීමට කණ්ඩායමක් යොදවා ඇති බව වෙළඳ නියෝජ්‍ය අමාත්‍ය ආර්.එම්. ජයවර්ධන පැවසීය.

පැල්වත්ත, සෙවනගල, ඇතිමලේ සහ ගල්ඔය යන කර්මාන්තශාලාවල දේශීයව නිෂ්පාදනය කරනු ලබන්නේ මුළු සීනි අවශ්‍යතාවයෙන් සියයට 11ක් පමණි.

වෙළඳ නියෝජ්‍ය අමාත්‍ය ආර්.එම්. ජයවර්ධන පවසා තිබුණේ පාරිභෝගිකයන්ගෙන් සියයට 20ක් පමණක් රට තුළ නිෂ්පාදනය කරන ලද දුඹුරු සීනි පරිභෝජනය කරන බවයි.

“ඉතිරි තොග විකුණා දැමීමට නොහැකි වීමට හේතුව පිළිබඳ අපි අධ්‍යයනය කරමින් සිටිනවා. අපි සීනි ආනයනය නතර කර තිබෙනවා. බලපත්‍රලාභී ආනයනකරුවන් හරහා දුඹුරු සීනි දැන් ආනයනය කරන්නේ නැහැ. තවමත්, වෙනත් තැනක ගබඩා කර ඇති තොග ඇති බවට අපි සැක කරනවා. මෙම තොග වෙළඳුන් විසින් ප්‍රමාණාත්මකව වෙළඳපොළට මුදා හරින බව පේනවා. සුදු සීනි සමඟ දුඹුරු සීනි ආනයනය කර වෙනත් තැනක ගබඩා කර තිබෙනවාද, නැතහොත් ඉහළ මිලකට අලෙවි කිරීම සඳහා රසායනික ක්‍රියාවලියක් හරහා සුදු සීනි දුඹුරු සීනි බවට පත් කර තිබෙනවා ද කියලා අපි හොයනවා. වගකිවයුත්තන් සොයා ගැනීම අභියෝගාත්මකයි. එහෙත්, එය සොයා ගැනීමට අපි දැනටමත් කණ්ඩායමක් යොදවා තිබෙනවා. මේ සම්බන්ධයෙන් අපි සීනි පර්යේෂණ ආයතනය, රේගුව සහ පාරිභෝගික කටයුතු අධිකාරිය වෙත දැනුම් දී තිබෙනවා,” යනුවෙන් ඔහු පැවසීය.

රජය සතු සමාගම් දෙකට සිය උක් අස්වැන්න මිලදී ගැනීමට අපොහොසත් වීම සම්බන්ධයෙන් ගොවීන් උද්ඝෝෂණ කිරීමත් සමඟ දේශීය සීනි කර්මාන්තය දැනට අර්බුදයක පවතී.

ගොවීන් තම ප්‍රදේශවල අඛණ්ඩව විරෝධතා දක්වා ඇත.

සමාගම් පෞද්ගලීකරණය කිරීමේ සැලැස්මක් තිබේදැයි කළ විමසීමකට නියෝජ්‍ය අමාත්‍යවරයා පවසා තිබුණේ “අපි ඒවා රජයේ ආයතන ලෙස පවත්වාගෙන යනවා,” යනුවෙනි.