මතභේදාත්මක කැරම් බෝඩ් ගනුදෙනුවට අදාළ තවත් නඩුවක් සම්බන්ධයෙන් අධිචෝදනා ගොනු කිරීමෙන් පසු, හිටපු ක්‍රීඩා අමාත්‍ය මහින්දානන්ද අලුත්ගමගේ, ලංකා සතොස හිටපු සභාපති නලින් ප්‍රනාන්දු සහ ශ්‍රී ලංකා යුද හමුදාවේ හිටපු මාණ්ඩලික ප්‍රධානී (විශ්‍රාමික) මේජර් ජෙනරාල් නන්ද මල්ලවාරච්චි යන අයට අද කොළඹ මහාධිකරණය විසින් ඇප නියම කරන ලදී. එහෙත්, ඒවා වෙනම චෝදනා යටතේ සිදුකර ඇත.

නීතිපතිවරයා විසින් අධිචෝදනා ගොනුකිරීමෙන් පසු, විත්තිකරුවන් තිදෙනාට රුපියල් ලක්ෂය බැගින් වූ මුදල් ඇප සහ රුපියල් මිලියන 2.5 බැගින් වූ ශරීර ඇප දෙකක් සහිතව මුදාහැරීමට කොළඹ ප්‍රධාන මහාධිකරණ විනිසුරු මංජුල තිලකරත්න නියෝග කළේය.

කෙසේවෙතත්, එම සිද්ධිය පදනම් කරගෙන අල්ලස් කොමිසම විසින් ගොනුකරන ලද වෙනම නඩුවකදී මහාධිකරණ ස්ථිර ත්‍රිපුද්ගල විනිසුරු මඩුල්ල විසින් මහින්දානන්ද අලුත්ගමගේ සහ නලින් ප්‍රනාන්දු යන දෙදෙනාට දැනටමත් වසර 20 ක බරපතල සිර දඬුවමක් නියම කර තිබේ.

මේ අතර, වත්මන් නඩුවේ චෝදනා පවත්වාගෙන යෑමේ හැකියාව අභියෝගයට ලක්කරමින් මූලික විරෝධතා මතුකිරීමට අදහස් කරන බව විත්තිකරුවන් වෙනුවෙන් පෙනීසිටි නීතිඥවරයා අධිකරණයට දැනුම් දුන්නේය.

මූලික විරෝධතා සළකා බැලීම සැප්තැම්බර් 4 වැනි දිනට කල්තැබිණි.

නලින් ප්‍රනාන්දු වෙනුවෙන් ජනාධිපති නීතිඥ සංජය රාජරත්නම් පෙනීසිටියේය. මහින්දානන්ද අලුත්ගමගේ වෙනුවෙන් ජනාධිපති නීතිඥ නලින් ලද්දුවහෙට්ටි සහ නීතිඥ සංජය මාරඹේ සමඟ ජනාධිපති නීතිඥ සාලිය පීරිස්, ජෙනරාල් මල්ලවාරච්චි වෙනුවෙන් ගීත් කරුණාරත්න සහ පසන් කරුණාරත්න යන අය පෙනීසිටියහ.