මිනිසා සඳ මතට පා තබා අදට (21) වසර 56ක් සපිරේ.

නවීන තාක්ෂ­ණය පිළි­බ­ඳව ආතර් සී. ක්ලාක් ආය­ත­නයේ නියෝජ්‍ය අධ්‍යක්ෂ (මාධ්‍ය) චින්තන විජේ­ව­ර්ධන ඒ සම්බන්ධයෙන් මෙසේ අදහස් පළකරයි.

නීල් ආම්ස්ට්‍රෝන්, එඩ්වින් ඕල්ඩ්‍රින්, මයි­කල් කොලින්ස් රැගත් ඇපලෝ 11 යානය ඓති­හා­සික සඳ ගමන ආරම්භ කළේ 1969 ජූලි 16 වැනි දින­යේදී අමෙ­රි­කාවේ කැලි­ෆෝ­නියා ප්‍රාන්තයේ කෙනඩි අභ්‍ය­ව­කාශ මධ්‍ය­ස්ථා­න­යෙනි. නීල් ආම්ස්ට්‍රෝන්, එඩ්වින් ඕල්ඩ්‍රින් රැගත් ඊගල් යානය සඳ මතට ගොඩ බැසීම සිදු­වූයේ 1969 ජූලි 20 වැනි දින රාත්‍රී 8.17 වන අතර නීල් ආම්ස්ට්‍රොන් සඳ මත පා තැබුවේ 10.56ටයි. මෙය සිදු­වූයේ මෙරට වේලා­වෙන් ජූලි 21 වැනි දිනයි. මයි­කල් කෝලින්ස් සඳට ගොඩ බැසී­මක් සිදු නොකළ අතර ඔහු මවු යානය පද­ව­මින් සඳ වටා ගමන් කර­මින් කළ මෙහෙය ඉතා අගය කළ යුත්තක්.

මේ සඳ ගමන සඳහා රට­වල් 137ක් දායක වූ අතර එයින් ශ්‍රී ලංකා­වට සුවි­ශේෂී තැනක් හිමි­වූයේ සඳෙන් රැගෙන ආ පස් පරීක්ෂා කළ මහා­චාර්ය සිරිල් පොන්න­ම්පෙ­රුම මහ­තාගේ දාය­ක­ත්වය හේතු­වෙනි. එතුමා නිසා ශ්‍රී ලංකා කොඩිය ද සඳ ගම­නට එක්කර ගැනීම සිදුවූ අතර එතුමා ආතර් සී. ක්ලාක් ආය­ත­නයේ ආර­ම්භක අධ්‍ය­ක්ෂ­ව­ර­යාද වන බව කීය.

ඇපලෝ 11 සිට 17 දක්වා යානා මිනි­සුන් සහි­තව සඳට ගිය අතර ඔවුන් කිලෝ 380ක පාෂාණ සහ පස් පෘථි­වි­යට ගෙන ආහ. මේ යානා­ව­ලින් සඳ­මත පා තැබූ ගග­න­ගා­මීන් ගණන 12කි. අව­සන් වරට මිනි­සුන් සහිත යාන­යක් සඳ වෙත යවනු ලැබුවේ 1972 දෙසැ­ම්බර් වූ අතර එය ඇපලෝ 17 යාන­යයි. මේ ගමන සඳහා හැරි­සන් ස්මිත්, ඊවන්, සර්නන් යන තිදෙනා සහ­භාගි විය. ඔවුන් සිතුවේ මේ ගමන සඳ ගවේ­ෂ­ණය සඳහා මිනි­සුන්ගේ අව­සන් අව­ස්ථාව බවයි. එම නිසා මේ ගම­නට එක් වූ සර්නන් තම දිය­ණි­යගේ නම සඳ මතු­පිට ලියා තැබී­මට කට­යුතු කළේය.

මින් පසුව මිනි­සුන් රහිත යානා සඳට යැවිණි. 1994දී ක්ලෙම­න්ට­යින් යානය මඟින් චන්ද්‍ර­යාගේ කාල­ගුණ තොර­තුරු, චන්ද්‍ර­යාගේ චුම්භක ක්ෂේත්‍රය ඇතුළු පරීක්ෂා කිරීම් සිදුකෙරිණි.