එක්සත් ජනපද වෙළඳපොළේ සිය නිෂ්පාදන තරඟකාරී වීම සඳහා වත්මන් අනුපාතය වන සියයට 30, සියයට 20 දක්වා අඩු කිරීමට තීරුබදු පිළිබඳ නැවත සිදුකෙරෙන සාකච්ඡාවලදී ශ්‍රී ලංකාව දැඩි උත්සාහයක් දරන බව එම වෙළඳ සාකච්ඡා සඳහා සම්බන්ධ මූලාශ්‍රයකින් වාර්තා වේ.

අමෙරිකානු ජනාධිපති ඩොනල්ඩ් ට්‍රම්ප් ශ්‍රී ලංකාවට සියයට 30ක තීරුබදු පැනවූ අතර එය මුලින් යෝජනා කළ සියයට 44ක ප්‍රමාණයට වඩා අඩු කිරීමකි.

ශ්‍රී ලංකා රජය එය ජයග්‍රහණයක් ලෙස දකින නමුත්, නවතම තත්වයන් යටතේ එක්සත් ජනපදය සමඟ වෙළඳාම් කිරීමේදී අනෙකුත් රටවල් සමඟ තරඟකාරී වීමට තවදුරටත් බදු අඩු කිරීමක් අවශ්‍ය බව විශ්වාස කරයි.

අමෙරිකා එක්සත් ජනපදය අගෝස්තු 1 වැනි දින දක්වා රටවල් සමග තවදුරටත් සාකච්ඡා කිරීමට කාලය විවෘතව තබා ගනී.

සියලු පාර්ශවකරුවන් සමඟ ඉදිරි මාවත සාකච්ඡා කිරීම සඳහා ජනාධිපති අනුර කුමාර දිසානායක පසුගිය සෙනසුරාදා රැස්වීමක් පැවැත්වීය.

මෙම රැස්වීමේදී, එක්සත් ජනපදය සමඟ වෙළඳාම් කිරීම සඳහා නැවුම් කොන්දේසි සෙවීමේදී රටේ ස්වෛරීභාවයට බලපාන ඕනෑම දෙයක් ඔහු බැහැර කළේය.

කෙසේවෙතත්, වඩා හොඳ ගනුදෙනුවක් සඳහා එක්සත් ජනපද වෙළඳ නියෝජිතයන් සමඟ සාකච්ඡා කිරීමට කණ්ඩායමක් වොෂින්ටන් වෙත යැවීමට රජය දැන් සැලසුම් කරමින් සිටී.

වත්මන් තීරුබදු අනුපාතය අවම වශයෙන් සියයට 20 දක්වා අඩු කර ගැනීමට බලාපොරොත්තු වන බවත් එසේ නොවුවහොත්, ශ්‍රී ලංකාවට තරඟකාරී වීමට අපහසු වනු ඇති බවත් වාර්තා වේ.

එක්සත් ජනපදය සමඟ වෙළඳ පරතරය අඩු කිරීම සඳහා කළ යුතු දේ සොයා බැලීම ද මෙහිදී සිදුවේ.

ශ්‍රී ලංකාව එක්සත් ජනපදයට ඩොලර් බිලියන 3කට ආසන්න භාණ්ඩ අපනයනය කරන අතර එයින් ඩොලර් බිලියන 1.2ක්ම ඇඟලුම්වලින් ලැබෙන ආදායම් වේ.

2025 අප්‍රේල් මාසයේදී, ජනාධිපති ට්‍රම්ප් රටවල් රැසකට අන්‍යෝන්‍ය තීරුබදු ප්‍රකාශයට පත් කළ අතර ශ්‍රී ලංකාව ද එම රටවල් අතරින් එකකි.

පසුව අමෙරිකානු ජනාධිපතිවරයා දින 90ක කාලයක් සඳහා ඔහුගේ තීරුබදු අත්හිටුවා රටවල්වලට එක්සත් ජනපදය සමඟ සාකච්ඡා කිරීමට කාලය ලබා දුන්නේය.

මේ අතර, ශ්‍රී ලංකාව ඉන්දියාව සමඟ ආර්ථික හා තාක්ෂණ සහයෝගීතාව (ETCA) පිළිබඳ සාකච්ඡා නැවත ආරම්භ කිරීම ඇතුළුව අනෙකුත් රටවල් සමඟ වෙළඳ විධිවිධාන පිළිබඳ සාකච්ඡා කඩිනම් කිරීමට උත්සාහ කරමින් සිටී.