අද අලුයම 5:30 ට පමණ ඉන්දියාවේ තිරුවල්ලූර් දුම්රිය ස්ථානය අසලදී ඩීසල් ප්‍රවාහනය කරමින් තිබූ භාණ්ඩ දුම්රියක වැගන් හතරක විශාල ගින්නක් හටගත් අතර එය අවට ප්‍රදේශවල භීතියක් ඇති කර තිබේ.

එම ස්ථානයේ දර්ශනවලින් පෙන්නුම් කළේ, ගිනිගත් වැගන්වලින් උස් ගිනිදැල් සහ ඝන කළු දුමාරයක් නැඟෙන බවයි.

ගිනි නිවන සහ ගලවාගැනීමේ කණ්ඩායම් එම ස්ථානයට පැමිණ දැඩි උත්සාහයකින් පසු ගින්න පාලනය කිරීමට සමත් විය.

අධික ලෙස ගිනි ගන්නා ඩීසල් තිබීම හේතුවෙන් ගින්න විශාල අභියෝගයක් වුවද, ජීවිත හානි හෝ අවට දේපළවලට හානි සිදුවී නොමැති බව නිලධාරීහු තහවුරු කළහ.

මනාලි සිට තිරුපති කලාපය දක්වා ගමන් කරමින් තිබූ දුම්රිය තිරුවල්ලූර් දුම්රිය ස්ථානය අසලදී ගින්නක් ඇති වී ඇති අතර, ඒ හේතුවෙන් පූර්වාරක්ෂාවක් ලෙස අවට ප්‍රදේශවලින් ජනතාව ඉවත් කිරීමට පියවර ගෙන තිබේ.

ගින්නට හේතුව තවමත් විමර්ශනය කරමින් පවතී.

සිද්ධිය හේතුවෙන් චෙන්නායි වෙත සහ ඉන් පිටතට දුම්රිය සේවා අඩාල වී ඇති අතර, බලධාරීන් සාමාන්‍ය තත්ත්වය යථා තත්ත්වයට පත් කිරීමට කටයුතු කරමින් සිටී.

චෙන්නායි සිට පිටත්වන දුම්රිය අටක් අවලංගු කර දුම්රිය පහක් හරවා යවන බව දකුණු දුම්රිය සේවය නිවේදනය කළේය.