ඊයේ(ජූලි 12) රාත්‍රියේ කඹුරුපිටිය, මාහේන ප්‍රදේශයේ සිදු වූ මාරාන්තික පිහියෙන් ඇනීමක් සම්බන්ධයෙන් පොලිසිය විමර්ශනයක් ආරම්භ කර තිබේ.

ලැබ ඇති පැමිණිල්ලට අනුව, මිතුරන් පිරිසකගේ මත්පැන් පානයක් අතරතුර ඇති වූ ආරවුලකින් යහලගොඩ ප්‍රදේශයේ පදිංචි 40 හැවිරිදි පුද්ගලයෙකු මියගොස් ඇති අතර, කළපුටුගල ප්‍රදේශයේ පදිංචි 42 හැවිරිදි තවත් පුද්ගලයෙකු බරපතල තුවාල ලබා ඇත.

මූලික පරීක්ෂණවලින් පෙනීයන්නේ ආරවුල උත්සන්න වී තියුණු ආයුධයකින් පහරදීමක් සිදුවී ඇති බවයි.

තුවාල ලැබූ පුද්ගලයා මේ වන විට කඹුරුපිටිය රෝහලේ ප්‍රතිකාර ලබන අතර, මියගිය පුද්ගලයාගේ දේහය රෝහල් මෘතශරීරාගාරයේ තබා ඇත.

සැකකරු එම ස්ථානයෙන් පළාගොස් ඇති බවත්, ඔහු අත්අඩංගුවට ගැනීමට කටයුතු කරමින් සිටින බවත් පොලිසිය පවසයි.