එක්සත් ජනපදයට අපනයනය කරන භාණ්ඩ සඳහා තීරුබදු අඩු කර ගැනීමට ශ්‍රී ලංකාව අපොහොසත් වීම දුර්වල හා අහංකාරමය සාකච්ඡාවල ප්‍රතිඵලයක් බව විපක්ෂ නායක සජිත් ප්‍රේමදාස පවසයි.

ශ්‍රී ලංකාවේ භාණ්ඩ සඳහා මෑතකදී පනවන ලද 30% අමෙරිකානු තීරුබදුවලට ප්‍රතිචාර දක්වමින් ඔහු මේ බව සඳහන් කර තිබේ.

“ශ්‍රී ලංකා අපනයන සඳහා 30% අමෙරිකානු තීරුබද්දක් යනු දුර්වල සාකච්ඡා සඳහා අප ගෙවන මිලයි. අපගේ අහංකාරකම සෑම විශේෂඥ හස්තයක්ම සෙවීමෙන් අපව වළක්වා ගත් අතර දැන් අමෙරිකානු ඩොලර් බිලියන 3කට ආසන්න අපනයන අවදානමකට ලක්වී තිබේ.” යනුවෙන් ඔහු තැබූ සටහනක දක්වා ඇත.

සංකීර්ණ සැබෑ ලෝක මට්ටමේ සාකච්ඡා සඳහා ‘පෙළපොත් විශේෂඥයන්’ මත යැපීමේ අන්තරායන් පිළිබඳ සිද්ධි අධ්‍යයනයක් ලෙස ඔහු මෙම තත්ත්වය විස්තර කර තිබේ.

ඔහු මෙම අදහස් පළ කළේ අප්‍රේල් මාසයේදී 44%ක්ව තිබී මේ වන විට අඩු කරන ලද නමුත් තවමත් සැළකිව යුතු ලෙස ඉහළ මට්ටමක පවතින වැඩි කළ තීරුබදුවල බලපෑම පිළිබඳ අපනයනකරුවන් සහ වෙළඳ ආයතන අතර ඉහළ යමින් තිබෙන කණස්සල්ල මධ්‍යයේය.