ඉන්දීය කණ්ඩායමේ බංග්ලාදේශ සංචාරය කල්දැමීමත් සමඟ ශ්‍රී ලංකාව සහ ඉන්දියාව අතර සීමිත පන්දුවාර තරගාවලියක් අගෝස්තු මැද භාගයේදී පැවැත්වීම සම්බන්ධයෙන් සාකච්ඡා කෙරෙමින් පවතී.

මීට පෙර ජූලි-අගෝස්තු මාසවල පැවැත්වීමට නියමිතව තිබූ ලංකා ප්‍රිමියර් ලීග් තරගාවලිය කල්දැමීම හේතුවෙන් ශ්‍රී ලංකා කණ්ඩායමට තවත් තරගාවලියක් සඳහා කාලය හිමිව ඇති අතර ඒ අනුව කණ්ඩායම් දෙකටම තරගයක් පැවැත්වීම සඳහා අවස්ථාව පවතී.

ඒ සම්බන්ධයෙන් මෙතෙක් නිල තහවුරු කිරීමක් සිදුකර නොමැති නමුත් මූලාශ්‍ර පෙන්වා දෙන්නේ, දෙරටෙහි ක්‍රිකට් ආයතන කෙටි ද්විපාර්ශ්වික තරඟාවලියක ශක්‍යතා ගවේෂණය කරමින් සිටින බවයි.

ඒ අනුව එක්දින තරග තුනක් සහ T20I තරඟ තුනක් ඇතුළත් වන පරිදි තරග සංවිධාන කිරීමේ හැකියාවක් පවතී.

ඉන්දියාව මේ වසරේ ශ්‍රී ලංකාවේ සංචාරය කිරීමට මුලින් සැලසුම් කර නොතිබූ අතර, බංග්ලාදේශ තරඟාවලිය කෙරෙහි අවධානය යොමුකර තිබූ නමුත් එය කල්දමා තිබේ.

මේ අතර, ශ්‍රී ලංකාව අගෝස්තු මස අගදී සිම්බාබ්වේ බලා පිටත්ව යෑමට නියමිත අතර, එම තරගමාලාව අගෝස්තු 29 වැනිදා ආරම්භ වේ.

ඒ හේතුවෙන් ඉන්දියාවට සත්කාරකත්වය දැක්වීමට ඇති එකම කාලසීමාව බවට පත්වන්නේ අගෝස්තු මැද භාගයයි.

දෙපිල අවසන් වරට 2023 ජූලි මාසයේදී ශ්‍රී ලංකාවේදී තරගාවලියක් සඳහා සහභාගී වූ අතර, එහිදී ඉන්දියාව T20I තරඟාවලිය ජයගත් අතර ශ්‍රී ලංකාව එක්දින තරඟාවලිය ජය ලැබීය.