May 28, 2025
ආරුගම්බේ සංචාරක ප්‍රදේශයේ බිකිනි තහනම් කර ඇති බවට පළවන අසත්‍ය ප්‍රවෘත්තිය සම්බන්ධයෙන් වහාම විමර්ශනයක් සිදුකරන ලෙස ආරක්ෂක අමාත්‍යාංශයෙන් සහ පොලිස්පතිවරයාගෙන් ඉල්ලා ඇති බව සංචාරක නියෝජ්‍ය අමාත්‍ය මහාචාර්ය රුවන් රණසිංහ පවසයි.
සංචාරක කර්මාන්තය ඉලක්ක කර ගනිමින් අසත්‍ය ප්‍රවෘත්ති පතුරුවා හරිමින් රජය අපහසුතාවයට පත්කිරීමට උත්සාහ කරන සංවිධානාත්මක කණ්ඩායමක් මෙය පිටුපස සිටින බවට නියෝජ්‍ය අමාත්‍යවරයා සැකකරයි.
මේ සම්බන්ධයෙන් ආරක්ෂක නියෝජ්‍ය අමාත්‍යවරයා, ආරක්ෂක අමාත්‍යාංශ ලේකම්වරයා සහ පොලිස්පතිවරයා දැනුවත් කිරීමට දැනටමත් පියවර ගෙන ඇති බව ඔහු පවසයි.
විදේශීය සංචාරකයකු ආරුගම්බේ සංචාරක ප්‍රදේශයේ නිරුවතින් ඇවිදිමින් සිටිනු දැකීමෙන් පසුව මෙම ගැටළුව ආරම්භ විය.
මෙම සිදුවීම පදනම් කරගෙන ‘බිකිනි තහනමක්’ පිළිබඳව සමාජ මාධ්‍යවල අසත්‍ය ප්‍රවෘත්ති පතුරුවා හැරීම සම්පූර්ණයෙන්ම පිළිගත නොහැකි බව නියෝජ්‍ය අමාත්‍යවරයා සඳහන් කරයි.
බිකිනි තහනම් කිරීමට රජය කිසිදු තීරණයක් ගෙන නොමැති බව ඔහු තහවුරු කරයි.
මුස්ලිම් ප්‍රජාව සහ අනෙකුත් කණ්ඩායම් අතර ගැටළු ඇති කිරීමට සහ රජය අපහසුතාවට ලක්කිරීමට මෙම සමාජ මාධ්‍ය සටහන බෙදාගෙන ඇති බවට ඔහු විශ්වාස කරයි.
මෙවැනි සිදුවීම් රටේ ආර්ථිකයට සහ සංචාරක කර්මාන්තයට බරපතල ලෙස හානි කළ හැකි බව නියෝජ්‍ය අමාත්‍යවරයා තවදුරටත් පවසයි.
බොහෝ විදේශීය සංචාරකයින් මේ වන විට ශ්‍රී ලංකාවට පැමිණෙන අතර, මෙවැනි අසත්‍ය ප්‍රවෘත්ති නිසා ඔවුන් මාලදිවයින හෝ බාලි වැනි වෙනත් ගමනාන්ත තෝරාගැනීමට පෙළඹෙනු ඇතැයි ඔහු බිය වේ.
ත්‍රිකුණාමලය-ආරුගම්බේ වෙරළබඩ ප්‍රදේශය ශ්‍රී ලංකාවේ සර්ෆින් සඳහා හොඳම ස්ථානය බව ඔහු අවධාරණය කරයි.
මේ වසරේ සංචාරකයන් මිලියන කිහිපයක් පිළිගැනීමට රට බලාපොරොත්තු වන අවස්ථාවක, එවැනි සිදුවීම් ශ්‍රී ලංකාවේ ප්‍රතිරූපයට අන්තර්ජාතිකව හානි කළ හැකිය.
මේ අතර, පළාත් පාලන ආයතනවල පාලනය ලබා ගැනීම පිළිබඳව ජුනි 6 වන දින රජය මුස්ලිම් මන්ත්‍රීවරුන් සමඟ පවත්වන ඉදිරි සාකච්ඡා කඩාකප්පල් කිරීමට මෙම ගැටලුව භාවිතා කළ හැකි බවට ඔහු සැකකරයි.
මෙය දේශපාලන අර්බුදයක් ඇති කිරීමට උත්සාහයක් විය හැකි බව ඔහු විශ්වාස කරයි.
සංචාරක කර්මාන්තය ඉලක්ක කර ගනිමින් ආර්ථිකයට හානි කිරීමට උත්සාහ කරන ඕනෑම පුද්ගලයෙකුට හෝ කණ්ඩායමකට එරෙහිව දැඩි නීතිමය පියවර ගන්නා බවට නියෝජ්‍ය අමාත්‍යවරයා අනතුරු අඟවයි.
