කුඩා හා මධ්‍ය පරිමාණ ව්‍යවසායකයන්ට සෘජුව බලාපාන පරාටේ නීතිය ක්‍රියාත්මක කිරීම සඳහා වූ අත්හිටුවීම තවදුරටත් දීර්ඝ කරන බව මුදල් අමාත්‍යාංශය නිවේදනය කර ඇත.

නිවේදනයක් නිකුත් කරමින් එම අමාත්‍යාංශය සඳහන් කර ඇත්තේ, මීට පෙර මාර්තු 31 දක්වා අත්හිටුවා තිබූ පරාටේ නීතිය ක්‍රියාත්මක කිරීම 2025 දෙසැම්බර් 31 දක්වා දීර්ඝ කර ඇති බවයි.

මුදල් අමාත්‍යාංශයට අනුව, රුපියල් මිලියන 25ට අඩු ණය ගන්නා සුළු හා මධ්‍ය පරිමාණ ව්‍යවසායකයින් සඳහා එම දීර්ඝ කිරීම අදාළ වේ.

2025 සැප්තැම්බර් 30 දක්වා දීර්ඝ කිරීම බලපැවැත්වෙන්නේ රුපියල් මිලියන 25 – 50 දක්වා ණය ලබාගෙන ඇති සුළු හා මධ්‍ය පරිමාණ ව්‍යවසායකයින් සඳහායි.

මුදල් අමාත්‍යාංශය වැඩිදුරටත් පැවසුවේ 2025 ජුනි 30 දක්වා දීර්ඝ කිරීම රුපියල් මිලියන 50 ඉක්මවා ණය ලබාගෙන ඇති කුඩා හා මධ්‍ය පරිමාණ ව්‍යාපාර සඳහා බලපැවැත්වෙන බවයි.

මෙම ප්‍රතිලාභ 2025 මාර්තු 31 කඩඉම් දිනට පෙර ඔවුන්ගේ අදාළ බැංකු සමඟ සාකච්ඡා ආරම්භ කළ කුඩා හා මධ්‍ය පරිමාණ ව්‍යවසායකයන් සඳහා පමණක් හිමිවන බව ද අමාත්‍යාංශය වැඩිදුරටත් පවසයි.

ඇතැම් කුඩා හා මධ්‍ය පරිමාණ ව්‍යවසායකයන් සාකච්ඡා සඳහා බැංකු වෙත නොපැමිණි බව නිරීක්ෂණය වූ බව ද මුදල් අමාත්‍යාංශය එම නිවේදනයේ සඳහන් කරයි.

ඊට ප්‍රතිචාර වශයෙන්, ශ්‍රී ලංකා බැංකු සංගමය විසින් සිංහල, දෙමළ සහ ඉංග්‍රීසි යන භාෂාවලින් ජාතික පුවත්පත්වල බහුභාෂා දැනුවත් කිරීමේ ව්‍යාපාරයක් දියත් කළ අතර ඉන් අනතුරුව සමාජ මාධ්‍ය ප්‍රවර්ධනය ඔස්සේ, සුළු හා මධ්‍ය පරිමාණ ව්‍යවසායකයන්ට ප්‍රතිලාභ ලබා ගැනීමට දිරිගන්වන ලදී.

බැංකු සමඟ සම්බන්ධ වී සිටින කුඩා හා මධ්‍ය පරිමාණ ව්‍යවසායකයන් සහන ප්‍රතිලාභ සාර්ථකව ලබාගෙන ඇති බවත්, පොලී අඩුකිරීම් සහ ආපසු ගෙවීමේ කාලසීමාවන් දක්වා දීර්ඝ කිරීම් ද ඊට ඇතුළත් වූ බවත් අමාත්‍යාංශය වැඩිදුරටත් පැහැදිලි කර තිබේ.

හිතාමතා ණය නොගෙවන්නන් බැංකු වෙත නොපැමිණිය හැකි වුවද, පරාටේ නීතියේ දිගුව අවසන් වුවද, සහන යාන්ත්‍රණයෙන් පිරිනමන ප්‍රතිලාභ ලබාගැනීම සඳහා ඉදිරි දින කිහිපය තුළ බොහෝ කුඩා හා මධ්‍ය පරිමාණ ව්‍යවසායකයන් ඉදිරිපත් වනු ඇතැයි බැංකුකරුවන් බලාපොරොත්තු වන අතර, එවැනි කුඩා හා මධ්‍ය පරිමාණ ව්‍යවසායකයන්ට සහාය වීමට තම සාමාජිකයන් කැමැත්තෙන් සහ සූදානමින් සිටින බව බැංකු සංගමය දන්වා සිටියි.