March 22, 2025
ඉන්දුනීසියාවේ ලෙවෝටෝබි ලකී-ලකී ගිනි කන්ද පුපුරා යෑමෙන් කිලෝමීටර් 8කට වඩා උස අළු වළාකුළු පිට වූ බව එරට බලධාරීහු පවසති.
අනතුරු ඇඟවීමේ තත්ත්වය ඉහළම මට්ටමට ඉහළ නැංවීම නිසා ඕස්ට්‍රේලියානු ගුවන් සමාගමක් ඊයේ(21) බාලි වෙත ගුවන් ගමන් කිහිපයක් අවලංගු කළේය.
නැගෙනහිර නුසා ටෙන්ගාරා පළාතේ පිහිටි ගිනි කන්ද බ්‍රහස්පතින්දා රාත්‍රියේ විශාල වශයෙන් පුපුරා යෑමෙන් පසු ජාතික භූ විද්‍යා ඒජන්සිය නිවේදනයක් නිකුත් කරමින් කියා සිටියේ මාර්තු 13 සිට එහි කුඩා පිපිරුම් දුසිම් ගණනක් සිදු වූ බවය.
ආපදා අවම කිරීමේ ඒජන්සියේ ප්‍රකාශකයකු රොයිටර්ස් පුවත් සේවයට පැවසුවේ ඉවත් කිරීම් අතරතුර එක් පුද්ගලයකු තුවාල ලබා ඇති බවයි.
ඉවත් කිරීම්වල ප්‍රමාණය හෝ සැපයුම් පිළිබඳ තොරතුරු ඔහු සතුව ඒ මොහොතේ තිබී නැත.
ක්වන්ටාස් එයාර්වේස් හි අඩු වියදම් අනුබද්ධිත සමාගමක් වන ජෙට්ස්ටාර්, ගිනිකඳු අළු හේතුවෙන් සිකුරාදා උදෑසන ඕස්ට්‍රේලියාව සහ ඉන්දුනීසියාවේ නිවාඩු නිකේතනයක් වන බාලි දූපත අතර එහි ගුවන් ගමන් අවලංගු කළ නමුත් දහවල් ගුවන් ගමන් නැවත ආරම්භ කිරීමට අපේක්ෂා කරන බව පැවසීය.
බාලි ගුවන් තොටුපළ ප්‍රකාශකයකු පැවසුවේ ගුවන් තොටුපළ තවමත් ක්‍රියාත්මක වන බවයි.
සිකුරාදා උදෑසන අන්තර්ජාතික ගුවන් ගමන් හතක් අවලංගු කර ඇති බවත්, සමහර දේශීය ගුවන් ගමන් ප්‍රමාද වී ඇති බවත් ඔහු සඳහන් කර තිබිණි.
පසුගිය වසරේ නොවැම්බර් මාසයේදී ලෙවෝටෝබි ලකී-ලකී ගිනිකන්ද පුපුරා යෑමෙන් අවට ගම්මානවලට උණුසුම් පාෂාණ සහ ලාවා ගලා යෑම නිසා අවම වශයෙන් පුද්ගලයන් නව දෙනෙකු මිය ගිය අතර දහස් ගණනක් ඉවත් කරන ලදී.
බ්‍රහස්පතින්දා පිපිරීමෙන් කොපමණ පදිංචිකරුවන් සංඛ්‍යාවක් පීඩාවට පත් වූවාද යන්න දැනට පැහැදිලි නැත.
ඔවුන් ස්ථිරවම වෙනත් ස්ථානයකට ගෙන යන බව ඉන්දුනීසියානු බලධාරීන් නොවැම්බර් මාසයේදී පවසා තිබිණි.
භූ විද්‍යා ඒජන්සිය ලාවා ගලා යෑම පිළිබඳ අනතුරු ඇඟවූ අතර සිකුරාදා අලුයම කුඩා පිපිරීම් ඇති විය හැකි බව ද පැවසීය.
ඉන්දුනීසියාවේ ක්‍රියාකාරී ගිනි කඳු 130කට ආසන්න සංඛ්‍යාවක් ඇති අතර ඒවා විවිධ භූ කම්පන තහඩු මත ඉහළ භූ කම්පන ක්‍රියාකාරකම් ඇති ප්‍රදේශයක් වන පැසිෆික් “ගිනි වළල්ලේ” පිහිටා ඇත.
