March 13, 2025
අනුරාධපුර ශික්ෂණ රෝහලේ වැඩබලන අධ්‍යක්ෂ දුලාන් සමරවීර සම්බන්ධයෙන් සමස්ත ලංකා රජයේ වෛද්‍ය නිලධාරීන්ගේ සංගමයේ සභාපති වෛද්‍ය ගිශාන්ත දසනායක ඊයේ විශේෂ අනාවරණයක් සිදුකළේය.
ජනමාධ්‍ය හමුවක් කැඳවමින් වෛද්‍ය ගිශාන්ත පෙන්වාදුන්නේ, නියමිත සුදුසුකම්වලින් තොරව, දේශපාලන බලය භාවිත කරමින්, වසර ගණනාවක් තිස්සේ අනුරාධුර ශික්ෂණ රෝහලේ අධ්‍යක්ෂවරයා ලෙස කටයුතු කරමින් සිටින බවයි.
දුලාන් සමරවීර යනු හිටපු ආණ්ඩුකාරවරයකුගේ පුත්‍රයකු බවද හෙතෙම එහිදී හෙළිකළේය.
ඔහුගේ පරිපාලනය යටතේ අනුරාධපුර රෝහල අරාජිකව පැවතුණු බවත්, එහි ප්‍රතිඵලයක් ලෙස රෝහල් සේවකයන්ට නිසි ආරක්ෂාවක් නොලැබුණු බවත්, වෛද්‍යවරියකට මෙම අතවරය සිදුවීමට හේතුව එලෙස නිසි ආරක්ෂාවක් නොතිබීම බවත් වෛද්‍ය ගිශාන්ත පෙන්වාදුන්නේය.
කෙසේවෙතත් රජයේ වෛද්‍ය නිලධාරීන්ගේ සංගමය සිය සාමාජිකයකු වන දුලාන් සමරවීර සම්බන්ධයෙන් කිසිදු ‘කතාවක්’ නොමැති බව වෛද්‍ය ගිශාන්ත දසනායක වැඩිදුරටත් සඳහන් කළේය.
