බස්නාහිර පළාතේ පොලිස් ස්ථානාධිපතිවරුන් 17 දෙනෙකු මාරුකිරීම සඳහා වැඩබලන පොලිස්පති ප්‍රියන්ත වීරසූරිය කර ඇති ඉල්ලීමට තවදුරටත් හේතු දක්වමින් වැඩිදුර විස්තර ලබා දෙන ලෙස ජාතික පොලිස් කොමිසම ඔහුගෙන් ඉල්ලා ඇති බව වාර්තා වේ.

එම මාරුවීම් ලැයිස්තුවට කොළඹ ප්‍රදේශයේ ප්‍රධාන පොලිස් ස්ථාන කිහිපයක ස්ථානාධිපතිවරුන් ඇතුළත් වේ.

වැඩබලන පොලිස්පතිවරයා විසින් ජාතික පොලිස් කොමිසමට යවන ලද පොලිස් ස්ථානාධිපතිවරුන්ගේ ලැයිස්තුවෙන් 17 දෙනෙකු පොලිසියේ ‘සමන්‍ය රාජකාරි’ සඳහා මාරු කිරීමට නියමිතය.

මෙම ස්ථාන මාරුවීම් බහුතරයක් සඳහා හේතු ලෙස දක්වා ඇත්තේ පොලිස් ස්ථානාධිපතිවරුන්ගේ පැත්තෙන් සිදු වූ බව කියන විෂමාචාර සම්බන්ධයෙන් වන බුද්ධි වාර්තාය.

කෙසේවෙතත්, ජාතික පොලිස් කොමිසමට ලබා දී ඇති වාර්තාවල සඳහන් චෝදනා සම්බන්ධයෙන් විනය පරීක්ෂණයක් හෝ අධිකරණයේ ආරම්භ කර ඇති අපරාධ නඩු විභාගයක් පිළිබඳ කිසිදු වාර්තාවක් නොමැති බව වාර්තා වේ.

ස්ථානාධිපතිවරුන්ගේ ස්ථාන මාරුවීම් සඳහා දක්වා ඇති හේතු පැහැදිලි නැති බවත්, ස්ථාන මාරුවීම් නිසි ක්‍රියා පටිපාටි අනුගමනය නොකරන බවත් ජාතික පොලිස් කොමිසම නිරීක්ෂණය කර ඇත.

අතිරික්ත පදනමක් මත ස්ථාන මාරුවීම් ලබා දීමට නියමිත ස්ථානාධිපතිවරුන් 17 දෙනා වෙනුවට ආදේශකයන් ලෙස නිර්දේශ කර ඇත්තේ ස්ථානාධිපති ධුරය දැරීමට අවශ්‍ය සුදුසුකම් නොමැති පහළ නිලයන් බව ජාතික පොලිස් කොමිසම නිරීක්ෂණය කර ඇත.

ආණ්ඩුක්‍රම ව්‍යවස්ථාවේ 21 වැනි සංශෝධනය යටතේ, පොලිස්පතිවරයා හැර අනෙකුත් පොලිස් නිලධාරීන් පත් කිරීම, උසස් කිරීම, මාරු කිරීම, විනය පාලනය සහ සේවයෙන් පහ කිරීම සම්බන්ධයෙන් ජාතික පොලිස් කොමිසමට පුළුල් බලතල තිබේ.

එම කොමිසමේ ප්‍රධාන අරමුණ වන්නේ පොලිස් දෙපාර්තමේන්තුව නිර්දේශපාලනීකරණය කිරීමයි.

ජාතික පොලිස් කොමිසමේ සභාපතිත්වය දරන්නේ විශ්‍රාමික මහාධිකරණ විනිසුරු ලලිත් ඒකනායක විසිනි.

කොමිසමේ අනෙකුත් සාමාජිකයන් වන්නේ විශ්‍රාමික අමාත්‍යාංශ ලේකම් රේණුකා ඒකනායක, විශ්‍රාමික දිස්ත්‍රික් ලේකම් කේ. කරුණාහරන්, නීතිඥ දිල්ෂාන් කපිල ජයසූරිය, ජනාධිපති නීතිඥ ඒ.ඒ.එම්. ඉලියාස් සහ විශ්‍රාමික නියෝජ්‍ය පොලිස්පති ජයන්ත ජයසිංහය.