January 17, 2025
අභියාචනාධිකරණ සභාපති විනිසුරු නිශ්ශංක බන්දුල කරුණාරත්නට එරෙහිව දෝෂාභියෝග යෝජනාවකට රජය දැනටමත් අත්සන් තබා ඇති බවට ජනමාධ්ය වාර්තා තිබියදීත්, පාර්ලිමේන්තුවේ නියෝජ්ය කථානායක රිස්වි සාලිහ් පවසන්නේ, ඔහුගේ දැනුමට අනුව, එවැනි පියවරක් දැනට ක්රියාත්මක නොවන බවයි.
‘ඩේලි මෝර්නින්’ සමග අදහස් දක්වමින් නියෝජ්ය කථානායකවරයා පවසා ඇත්තේ, එවැනි කිසිදු පියවරක් පිළිබඳව පාර්ලිමේන්තුවට හෝ නියෝජ්ය කථානායකවරයා ලෙස තමාව දැනුවත් කර නොමැති බවයි.
මෙම ප්රකාශ නිකුත් වන්නේ, විනිසුරු කරුණාරත්නට එරෙහිව දෝෂාභියෝග යෝජනාවකට පාර්ලිමේන්තු මන්ත්රීවරුන් 100 කට අධික සංඛ්යාවක් අත්සන් කර ඇති බවත්, නියෝජ්ය අමාත්යවරයෙකු විසින් මන්ත්රීවරුන් 118 දෙනෙකුගේ අත්සන් දැනටමත් ලබාගෙන ඇති බව තහවුරු කර ඇති බවත් ප්රකාශ කරන ජනමාධ්ය වාර්තා මධ්යයේ ය.
අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සිය ධුරයෙන් ඉල්ලා අස්වීමට නියමිත බව වාර්තා වේ.
ජාතික ජන බලවේග ආණ්ඩුව ඔහුට එරෙහිව දෝෂාභියෝග යෝජනාවක් ඉදිරිපත් කිරීමට සැලසුම් කර ඇති පසුබිමක මෙම තීරණය ගෙන ඇති බව පැවසේ.
ඒ අනුව විනිසුරු කරුණාරත්න මේ මස අවසානයේ සිය ඉල්ලා අස්වීම ඉදිරිපත් කිරීමට නියමිත බව දැනගන්නට ඇත.
අභියාචනාධිකරණ විනිසුරුවරුන්ගේ විශ්රාම යන වයස අවුරුදු 63 වන බැවින් පසු ඔහු මේ වසරේ ජුනි 16 වැනි දින විශ්රාම යෑමට නියමිතව සිටියි.
