ඉදිරි පළාත් පාලන මැතිවරණය සඳහා සාමූහික ප්‍රවේශයක් සකස් කිරීම සඳහා එක්සත් ජාතික පක්ෂය ඇතුළු විපක්ෂ පක්ෂ සමඟ සම්බන්ධවීමට සමගි ජන බලවේග කෘත්‍යාධිකාරී මණ්ඩලය අනුමැතිය ලබා දී ඇති බව විපක්ෂ නායක සජිත් ප්‍රේමදාස නිවේදනය කළේය.

විදුලි ගාස්තු අඩු කිරීම, ඉන්ධන මිල අඩු කිරීම සහ පොහොර සහනාධාර ලබාදීම වැනි ප්‍රධාන පොරොන්දු ඉටුකිරීමට අපොහොසත් වීම සම්බන්ධයෙන් සමගි ජන බලවේග මූලස්ථානයෙන් පිටතදී අදහස් පළකරමින් සජිත් ප්‍රේමදාස මහතා ආණ්ඩුව විවේචනය කළේය.

රජයේ පොරොන්දු සහ ක්‍රියාමාර්ග අතර පරතරය මහජනතාවගේ අවශ්‍යතා සපුරාලීමට ඇති නොහැකියාව මගින් දැකගත හැකි බව ඔහු පැවසීය.

සැළකිව යුතු ජනවරමක් හිමි ආණ්ඩුව තම පොරොන්දු ඉටුකරන ලෙස සජිත් ප්‍රේමදාස ඉල්ලා සිටියේය.

එය අසාර්ථක වුවහොත්, විපක්ෂය ප්‍රජාතන්ත්‍රවාදී රාමුවක් තුළ මහජනතාව වෙනුවෙන් පෙනීසිටීම දිගටම කරගෙන යන බවට ඔහු සහතික විය.

මැතිවරණය සඳහා සමගි ජන බලවේගයේ සූදානම සහ මහජනතාවගේ ගැටළු විසඳීම සඳහා අනෙකුත් විපක්ෂ පක්ෂ සමඟ සහයෝගයෙන් කටයුතු කිරීමේ සුදානම එහිදී සජිත් ප්‍රේමදාස යළි තහවුරු කළේය.