කොළඹ වරායේ බටහිර පර්යන්තයට අරමුදල් සැපයීම සඳහා ඇමරිකානු නියෝජිතායතනයක් සමඟ ඇතිකරගත් ණය ගනුදෙනුවෙන් ඉන්දියාවේ ප්‍රකෝටිපති ව්‍යාපාරික ගෞතම් අදානි ඉවත් වී තිබේ.

කලාපය තුළ චීනයේ වැඩෙන බලපෑමට එරෙහිව ඉන්දියාව සහ අමෙරිකාව දරන උත්සාහයක් ලෙස වසරකට පෙර එම ගිවිසුම පැසසුමට ලක්ව තිබිණි.

ඒ අනුව, පසුගිය මාසයේ අමෙරිකානු අධිකරණයකින් චෝදනා ලැබූ ගෞතම් අදානිට බහුතර කොටස් අයත් Adani Ports and Special Economic Zone සමාගම පවසා ඇත්තේ, එක්සත් ජනපද ජාත්‍යන්තර සංවර්ධන මූල්‍ය සංස්ථාවෙන් (US International Development Finance Corporation) ඩොලර් මිලියන 553 ක් වටිනා ණයක් පිළිබඳ සාකච්ඡාවලින් ඉවත් වන බවයි.

පසුගිය මාසයේ අල්ලස් චෝදනා එල්ල වීමෙන් පසුව US International Development Finance Corporation කියාසිටියේ තමන් තවමත් ගනුදෙනුව සම්බන්ධයෙන් නිසි සැලකිල්ලක් දක්වන බව හා ණය සම්බන්ධයෙන් අවසන් එකඟතාවයකට පැමිණ නොමැති බවයි.

කෙසේවෙතත් නිවේදනයක් නිකුත් කරමින් Adani Ports and Special Economic Zone සමාගම කියාසිටියේ “සමාගමේ අභ්‍යන්තර උපචිත සහ ප්‍රාග්ධන කළමනාකරණ සැලැස්ම හරහා මෙම ව්‍යාපෘතියට මුදල් සපයනු ලැබේ” යනුවෙනි.

“අපි DFC වෙතින් මූල්‍යකරණය සඳහා වූ අපගේ ඉල්ලීම ඉල්ලා අස්කර ගත්තෙමු.” එහි දැක්වේ.

එක්සත් ජනපද විදේශ ප්‍රතිපත්ති ඉලක්ක ඉදිරියට ගෙන යන අතරතුර සංවර්ධනය වෙමින් පවතින රටවලට ආධාර කිරීම සඳහා පිහිටුවන ලද රජයේ ආයතනයක් වන සංවර්ධන මූල්‍ය සමාගම, අදානි ව්‍යාපාරයේ ඉල්ලා අස්කර ගැනීමේ ප්‍රකාශය පිළිබඳ අදහස් දැක්වීම සඳහා වූ ඉල්ලීම්වලට වහාම ප්‍රතිචාර දැක්වූයේ නැත.

දේශීය ශ්‍රී ලාංකික හවුල්කරුවන් ද සිටින මෙම ව්‍යාපෘතියේ ඉදිකිරීම් දැනටමත් ආරම්භ කර තිබේ.

සංවර්ධනය වෙමින් පවතින රටවල යටිතල පහසුකම් ආයෝජනය සඳහා චීනයට විකල්පයක් ඉදිරිපත් කිරීමට එක්සත් ජනපදයේ උද්යෝගය මධ්‍යයේ ශ්‍රී ලංකාවේ පර්යන්තය සඳහා ණය ගිවිසුම පසුගිය වසරේ අත්සන් කරන ලදී. (Bloomberg)

එය මුලදී 2024 දෙසැම්බර් වන විට ක්‍රියාත්මක වීමට නියමිතව තිබූ අතර, කොළඹ බටහිර බහාලුම් පර්යන්තය එක්සත් ජනපද රාජ්‍ය ආයතනයේ ආසියාවේ විශාලතම යටිතල පහසුකම් ආයෝජනය වන අතර ගෝලීය වශයෙන් එහි විශාලතම ආයෝජනය වනු ඇත.