රුසියානු යුද්ධය සඳහා යාපනයේ තරුණයන් කිහිප දෙනෙකු බලහත්කාරයෙන් බඳවාගෙන ඇති බවට නිල තොරතුරක් ලැබී නොමැති බව කොළඹ රුසියානු තානාපති කාර්යාලය ප්‍රකාශ කර තිබේ.

එම තානාපති කාර්යාලය මේ බව සඳහන් කර ඇත්තේ සංචාරක වීසා මත ප්‍රංශයට සහ බෙල්ජියමට යෑමට උත්සාහ කළ යාපනයේ තරුණයන් කිහිප දෙනෙකු යුක්රේනයට එරෙහි යුද්ධය සඳහා බඳවාගෙන ඇති බවට පළ වූ වාර්තාවලට ප්‍රතිචාර දක්වමිනි.

යුක්රේනයට එරෙහි යුද්ධය සඳහා තවත් තරුණයන් කිහිප දෙනෙකු සමඟ බලහත්කාරයෙන් රැගෙන ගොස් රුසියානු හමුදාවට එක් කරගෙන සිටින තම පුතා බේරා දෙන ලෙස යාපනයේ මවක කළ ආයාචනයක් මීට පෙර වාර්තා විය.

රුසියානු හමුදාවට කුලී හේවායන් ලෙස සේවය කිරීම සඳහා උතුරු නැගෙනහිර තරුණයන් රහසිගතව බඳවාගනු ලබන ව්‍යාජ සංචාරක නියෝජිතයකු විසින් තිදරු පියකු ඇතුළු තරුණයන් හය දෙනකු රවටා ඇතැයි වාර්තා වේ.

මෙම වාර්තාවලට ප්‍රතිචාර දක්වමින් රුසියානු තානාපති කාර්යාලය අවධාරණය කළේ රුසියාව සහ ශ්‍රී ලංකාව අතර සම්ප්‍රදායික මිත්‍ර සබඳතා අපකීර්තියට පත්කිරීමේ අරමුණින් සිදුකර තිබෙන තහවුරු නොකළ මෙම දත්ත තානාපති කාර්යාලය සමීපව නිරීක්ෂණය කරන බවයි.

“රුසියානු බලධාරීන් ඔවුන්ගේ රටට පැමිණෙන සියලුම විදේශිකයන්ට ගරු කරන අතර ඔවුන්ගේ පෞද්ගලික තේරීම, නිපුණතා සහ පවතින පුරප්පාඩු මත පදනම්ව ඔවුන්ට රැකියා අවස්ථා ලබා දීමට සූදානම්,” යනුවෙන් තානාපති කාර්යාලය ප්‍රකාශ කළේය.

රුසියාවේ සිටින ශ්‍රී ලාංකික පුරවැසියන් සම්බන්ධ ගැටලු මූලික වශයෙන් හසුරුවන්නේ මොස්කව්හි පිහිටි ශ්‍රී ලංකා තානාපති කාර්යාලය බවත් ශ්‍රී ලාංකිකයන් රුසියාවට එවන දේශීය සංචාරක ආයතන පිළිබඳ නිල තොරතුරක් ලැබී නොමැති බවත් තානාපති කාර්යාලය යළිත් අවධාරණය කළේය.

කෙසේවෙතත්, ශ්‍රී ලංකා බලධාරීන්ගෙන් ඉල්ලීමක් ලැබුණහොත් එවැනි ක්‍රියාකාරකම් විමර්ශනය කිරීමට සහාය වීම සඳහා තානාපති කාර්යාලය කැමැත්ත පළ කර තිබේ.

රුසියානු-යුක්රේන යුද්ධය සඳහා මෙරට හිටපු යුධ හමුදා සෙබළුන් ඇතුළු පුද්ගලයන් වංචනික ලෙස බඳවා ගැනීමේ වැඩිවීමක් පසුගිය වසර පුරා වාර්තා විය.

කුලී හේවා කණ්ඩායම්වල සටන් කිරීම සඳහා හිටපු යුද හමුදා සෙබළුන් සහ පුද්ගලයන් රුසියාවට යැවීමේ මිනිස් ජාවාරමක් පසුගිය රජය විසින් අනාවරණය කර ගත්තේය.

රුසියානු යුක්රේන යුද්ධයේදී ශ්‍රී ලාංකිකයන්ට විවිධ ප්‍රතිලාභ ලබා දෙන බවට පොරොන්දු වෙමින් සටන් කිරීමට ශ්‍රී ලාංකිකයන් යැවීමට සම්බන්ධ විශ්‍රාමික හමුදා සාමාජිකයන් කිහිප දෙනෙකු අත්අඩංගුවට ගනු ලැබිණි.

පවතින ආර්ථික අර්බුද මධ්‍යයේ රට හැර යෑමට තැත් කිරීමේදී බොහෝ දෙනෙක් මෙම ජාවාරම්වලට ගොදුරුව ඇති බව වාර්තා වේ.