November 6, 2024
ශ්‍රී ලංකාවේ නව ආණ්ඩුව ඉදිරි වසරක කාලය තුළ විදුලි ගාස්තු 30% කින් අඩුකිරීම සඳහා විදුලිබල ක්ෂේත්‍රය ප්‍රතිව්‍යුහගතකරණය කිරීමට අපේක්ෂා කරන බව ජනාධිපතිගේ ආර්ථික කටයුතු සහ මුදල් පිළිබඳ ජ්‍යෙෂ්ඨ උපදේශක මහාචාර්ය අනිල් ප්‍රනාන්දු පැවැසීය.
ඊයේ (5) ටීවී දෙරණට නාලිකාවේ වැඩසටහනකට එක්වෙමින් හෙතෙම කියාසිටියේ රජය සතු ව්‍යවසාය (SOE) ප්‍රතිව්‍යුහගතකරණය කිරීම ඉදිරියට ගෙන නොයන බව රජය නිල වශයෙන් ප්‍රකාශ කර නොමැති බවයි.
“අපි 100%ක් රජය සතු ව්‍යවසාය ප්‍රතිව්‍යුහගතකරණය කිරීම සමඟ එකඟ වෙනවා, අපි එය කරන්නේ කොහොමද කියන එක පැහැදිලිව ප්‍රකාශ කරනවා,” ඔහු පැවැසීය.
උපරිම වසරක කාලයක් ගතවන විට විදුලි ගාස්තු සියයට 30 කින් අඩුකිරීමට ප්‍රතිව්‍යුහගතකරණය කළ යුතු බව ඔහු සඳහන් කළේය.
රජය සතු ව්‍යවසාය ප්‍රතිව්‍යුහගතකරණය කිරීම යනු ඒවා පෞද්ගලික අංශයට විකිණීම යැයි සමාජය සිතන බවද ඔහු පැවැසීය.
පෞද්ගලික අංශය විදුලිබල උත්පාදනයට සම්බන්ධ කර ගනිමින් විදුලිබල ක්ෂේත්‍රයේ ප්‍රතිසංස්කරණවල, සම්ප්‍රේෂණ සහ බෙදාහැරීමේ අයිතිය රාජ්‍යයට තබාගැනීම උපායමාර්ගික හා දේශපාලනික වශයෙන් සුදුසු බව වත්මන් ආණ්ඩුව දකින බව ඔහු පෙන්වාදුන්නේය.
ජනාධිපතිවරයා දැනටමත් ප්‍රකාශ කර ඇති පරිදි විදුලිබල ක්ෂේත්‍රය තාප විදුලිය මත රඳාපැවතීම මතින් ඉවත් විය යුතු බවත් එය මිල අධික බවත් හෙතෙම සඳහන් කළේය.
