පාඩු ලබන වැවිලි සමාගම් නැවත රජයට පවරා ගැනීමට රජය සළකා බලමින් සිටින බව වාර්තා වේ.

ඒ සම්බන්ධයෙන් නිර්දේශ ඉදිරිපත් කිරීමට කමිටුවක් පත් කිරීමට නියමිතය.

රජය බදු පදනම මත ලබාදී ඇති වතු සමාගම් 22ක් සඳහා හොඳම ඉදිරි මාර්ගය මෙම කමිටුව විසින් තීරණය කරන බව කැබිනට් ප්‍රකාශක බන්දුල ගුණවර්ධන සඳහන් කර තිබේ.

මෙම සමාගම්වලට තම සේවකයන්ගේ දෛනික වැටුප පවා ගෙවීමට නොහැකි නම් කල්බදු මුදල කපා දමා නව හිමිකරුවන්ට ලබාදීම වඩා හොඳ බව ඔහු පැවසීය.

වතු සමාගම් පසුගියදා අවධාරණය කර තිබුණේ අවම දෛනික වැටුප රුපියල් 1700ක් සම්බන්ධයෙන් සමාගම් අවසන් තීරණයක් ගෙන නොමැති බවයි.

කොටගල පැවති මැයි දින රැලියකදී ජනාධිපතිවරයා පවසා තිබුනේ රුපියල් 1700ක් වන වතු කම්කරුවන්ගේ අවම දෛනික වැටුප මැයි මාසයේ සිට ක්‍රියාත්මක වන බවයි.

පසුව නිවේදනයක් නිකුත් කරමින් ලංකා වැවිලිකරුවන්ගේ සංගමය කියා සිටියේ තේ සහ රබර් වගාව ආශ්‍රිත කම්කරුවන් සඳහා යෝජිත වැටුප් වැඩිකිරීම් පිළිබඳව පසුගිය අප්‍රේල් 30 වැනි දින අංක 2382/04 දරන ගැසට් පත්‍රයේ පළ වූ නිවේදනයෙන් පසු පුළුල් මාධ්‍ය ප්‍රචාරයක් තිබූ බවයි.

මේ සම්බන්ධයෙන් අවසන් තීරණයක් ගෙන නොමැති විට ජනාධිපතිවරයාගේ ප්‍රකාශය වරදවා වටහාගෙන කම්කරුවන් සහ මහජනතාව උපකල්පනවලට එළඹිය හැකි බවට ශ්‍රී ලංකා වැවිලිකරුවන්ගේ සංගමය සහ එහි සාමාජිකයන් කණස්සල්ල පළ කර තිබේ.

ශ්‍රී ලංකා වැවිලිකරුවන්ගේ සංගමය පවසා තිබුණේ නව යෝජිත අවම ගෙවීම ක්‍රියාත්මක වන දිනය හෝ එම ගෙවීමේ ප්‍රමාණය මෙතෙක් තීරණය කර නොමැති බවයි.