ශ්‍රී ලංකා ජාතික දැල්පන්දු සංචිතයේ හිටපු නායිකා සේමිණී අල්විස් තහනම් උත්තේජක භාවිත කළ බවට ශ්‍රී ලංකා තහනම් උත්තේජක මර්දන ඒජන්සිය (SLADA) විසින් පවත්වන ලද අහඹු පරීක්ෂණයකට අනුව චෝදනා එල්ල වී තිබේ.

සේමිණී සැප්තැම්බර් 26 සිට ඔක්තෝබර් 6 දක්වා සෞදි අරාබියේ පැවැත්වෙන 13 වැනි ආසියානු දැල්පන්දු ශූරතාවලියට සූදානම් වීම සඳහා ශ්‍රී ලංකා දැල්පන්දු සම්මේලනය (NFSL) විසින් පිහිටුවන ලද ජාතික දැල්පන්දු සංචිතයේ සාමාජිකාවකි.

මාර්තු 21 වැනි දින SLADA විසින් කරන ලද පරීක්ෂණයකින් පසු මූලික මුත්‍රා සාම්පලවල තහනම් උත්තේජක අඩංගු බව ලෝක තහනම් උත්තේජක මර්දන නියෝජිතායතනය (WADA) සේමිණී සහ SLADA වෙත නිල වශයෙන් දන්වා ඇත.

ශ්‍රී ලංකා දැල්පන්දු ක්‍රීඩිකාවක් SLADA සහ WADA විසින් පවත්වන ලද මත්ද්‍රව්‍ය පරීක්ෂණයකින් අසමත් වූ පළමු අවස්ථාව මෙයයි.

ක්‍රීඩිකාවට තම නිර්දෝෂීභාවය ඔප්පු කිරීම සඳහා ‘බී’ සාම්පල පරීක්ෂණයක් සමඟ ඉදිරියට යා හැකි නමුත් එතෙක් ඇය ජාතික සංචිත පුහුණු සැසිවලට සහභාගී වීම තාවකාලිකව අත්හිටුවා ඇත.

සේමිණී යනු 2015 සහ 2019 වසරවල දැල්පන්දු ලෝක කුසලාන තරගාවලි දෙකකදී සහ ආසියානු ශූරතා (කනිෂ්ඨ සහ ජ්‍යෙෂ්ඨ) කිහිපයකදී රට නියෝජනය කළ ප්‍රවීණ ක්‍රීඩිකාවකි.

ඇය 2015 ඕස්ට්‍රේලියාවේ පැවැති සිඩ්නි ලෝක කුසලානයේ ශ්‍රී ලංකා කණ්ඩායමේ නායිකාව විය.