එක්සත් ජාතීන්ගේ නේවාසික සම්බන්ධීකාරක කාර්යාලය, රුසියානු හමුදාවට බඳවාගත් බවට වාර්තාවන ලාංකිකයන්ගේ පවුල්වලින් ලැබුණු ලිපි විශාල සංඛ්‍යාවක් ශ්‍රී ලංකාවේ විදේශ කටයුතු අමාත්‍යාංශය වෙත යොමුකර ඇත.

මේ අතර, වංචා කර රුසියානු හමුදාවට බඳවාගත් අයගේ පවුල් කිහිපයක් ඉදිරි සතියේ අපරාධ පරීක්ෂණ දෙපාර්තමේන්තුව (CID) වෙත යෑමට නියමිත අතර, ඔවුන් දේශීය නියෝජිතයන් විසින් වංචා කර ඇති බවට පැමිණිලි කිරීමට නියමිතය.

පසුගිය මාසයේදී අපරාධ පරීක්ෂණ දෙපාර්තමේන්තුවේ මිනිස් ජාවාරම් සහ සමුද්‍ර අපරාධ කොට්ඨාශය මේ සම්බන්ධයෙන් විශ්‍රාමික මේජර්වරයකු සහ රැකියා නියෝජිතයකු අත්අඩංගුවට ගනු ලැබීය.

කෙසේවෙතත්, රුසියාවේ සිටින ලාංකික බඳවාගත් අයගේ ඥාතීන් පවසන්නේ කාන්තාවන් ඇතුළු තවත් ‘වැරදිකරුවන්’ කිහිපදෙනකු මෙම ජාවාරම පිටුපස සිටින බවත්, ඔවුන්ගෙන් බොහෝදෙනකු රුසියානු සබඳතා ඇති හෝ ලාංකික සම්භවයක් ඇති රුසියාවේ සහයෝගිතාකරුවන් සමඟ කටයුතු කරන බවත්ය.

කෙසේවෙතත්, මොස්කව් හි ශ්‍රී ලංකා තානාපති මහාචාර්ය ජනිතා අබේවික්‍රම ලියනගේ මේ සතියේ ‘සන්ඩේ ටයිම්ස්’ කළ විමසීමකදී පවසා ඇත්තේ, තමාට මේ පිළිබඳව කිසිදු තොරතුරක් වාර්තා වී නොමැති බවයි.

එක්සත් ජාතීන්ගේ කාර්යාලයට ලැබුණු ලිපිවලින් සහ තවත් එක්රැස් වූ තොරතුරුවලින් සනාථ වන්නේ, මෙම වංචාවට ගොදුරු වූ ලාංකිකයන්ගෙන් බහුතරයක් රුසියානු හමුදාව සමඟ සටන් නොකරන අංශවල රැකියා සඳහා පොරොන්දු වූ යුද අත්දැකීම් ඇති හිටපු හමුදා සාමාජිකයන් බවයි.

ඔවුන්ට කොළඹ රුසියානු තානාපති කාර්යාලය මගින් කෙටි කාලීන සංචාරක වීසා නිකුත් කර ඇත.